Ўшанда жазирама ёз кунларининг бири эди. Ариқ ёқалаб кимсасиз боғ томон икки боласини етаклаб кетаётган бегона аёл Юзон қишлоғида яшовчи Шерзод исмли ўспиринда шубҳа уйғотди. Кўнглидан “Қизиқ, бу овлоқ жойда унга нима бор экан?”, деган фикр кечди.

Орадан ҳаял фурсат ўтмай сокин оқиб турган, эни 5 – 6 метр, чуқурлиги икки метрча бўлган ариқдан сувнинг қаттиқ тўлқинлангани товуши эшитилди. Шерзод синчиклаб қаради: аёлнинг қораси кўринмасди. Шунда юраги “шув” этди – ю яқин орадаги қўшнисига хабар бергани югурди.Сўнг отасига қўнғироқ қилди.

Икковлон етиб келишганида ожизгина болажон сув бетида бир кўриниб, бир кўринмай жон талвасасида оқиб кетаётган эди. Қўшни ечина солиб ўзини ариққа ташлади. Болани сувдан олиб чиқди. “Ёмон аҳволда эди. Ҳатто жон берган, деб ўйладим. Аммо қоринчасини сағал босиб, қўлимдан келганича биринчи ёрдам кўрсатгандим, ичидан сув отилиб чиқди. Нафас ола бошлади”, дейди у.

Орадан сал фурсат ўтиб, ариқда бояги аёл ҳам кўринди. У қўлида чинқираб йиғлаётган икки ёшли гўдаги билан турарди. Афтидан, аёл қандай мудҳиш ишга қўл урганини англагану, оналик меҳри ийиб болани сувдан чиқариб олганди.

Бу орада юзонлик фуқаролар зудлик билан уни ва жабрдийда болаларини шифохонага етказди. Докторларнинг кейинчалик гувоҳлик беришларича, айнан шу нарса болаларнинг ҳаётини сақлаб қолишга сабаб бўлган. Акс ҳолда...

Хўш, нафақат ўзининг, балки фарзандларининг ҳам умрига зомин бўлиб, болакуш деган мудҳиш ном олишига бир баҳя қолган бу аёл ким эди? У қандай тошбағир онаки, гулдай икки полапонининг жонига қасд қилмоққа журъат этди? Юраги қордек беғубор бу жажжи болажонларда нима айб?

Шу каби саволларга жавоб топиш учун Ромитан туманида туғилиб ўсган, эндигина 22 ёшга кирган Шаҳрибону (исми шарифи ўзгартирилган) тўғрисида қисқача маълумот беришни лозим топдик. Биринчи турмушидан оилавий келишмовчилик туфайли ажрашган аёл шириндан шакар ўғилчасини олиб, Юқоричирчиқ туманида яшовчи бир эркак билан шаръий никоҳдан ўтди. Яна ўғил кўрди. Аммо “Эски ҳаммом, эски тос”, деганларидай тағин оилавий келишмовчиликлар юзага қалқиб чиқди. Ўртадан меҳр –оқибат кўтарилди. Биз эса ҳозир оила пойдевори вазифасини ўтовчи ўша меҳру – муҳаббат бормиди ўзи, дея ўйга толамиз. Алалхусус, эр хорижга ишлагани кетди. Ромитанга – онасиникига келган Шаҳрибону бу ерда ҳам тинчини топмади. Турмуш ўртоғининг ҳовлини сотмоқчи бўлаётгани, бошқа бир аёлга илакишиб қолгани ҳақидаги миш – мишлар қулоғига етгач, буткул оромини йўқотди. Кўнглида шайтон васваса солди.“Мени ҳам, икки боламни ҳам ҳеч кимга кераги йўқ”, деган фикр миясини зарпечакдек ўраб олди.

Бир куни шаҳарга бориш баҳонасида йўлга отланди. “Ромитан – Бухоро” йўналишида қатновчи автоуловга чиққач, кимсасиз жойда тушиб қолди. Бу сезганингиздек, Юзон қишлоғининг бир чеккаси эди.

Воқеаларнинг кейинги ривожи эса Шаҳрибонунинг суд столига ўтириши билан хотима топди. Жиноят ишлари бўйича Ромитан туман суди унинг қилмишини атрофлича ўрганди. Яқинлари ҳамда гувоҳларнинг кўрсатмаларига, далилий ашёларга таянган ҳолда суд Жиноят кодексининг тегишли моддаларини қўллаб уни тўрт йил муддатга озодликдан маҳрум қилди. Суд ҳукмига апелляция тартибида келтирилган шикоят аппеляция инстанцияси судлов ҳайъати томонидан қаноатлантирилмади.Ҳукм ўз кучида қолди.

Истам ИБРОҲИМОВ, “Халқ сўзи”.