Бош прокуратура ҳузуридаги Департаментнинг Балиқчи тумани бўлими, ИИБ ва Солиқ инспекцияси ходимлари ҳамкорлигида тезкор тадбир ўтказилди, деб хабар бермоқда Иқтисодий жиноятларга қарши курашиш департаменти.

Унда айтилишича, ўтказилган тезкор тадбир давомида «Гулшан» МФЙ ҳудудидаги озиқ-овқат дўконида қонунга хилоф равишда алкоголь маҳсулотлари савдоси билан шуғулланиб келган фуқаро Х.Ю. харидор Ғ.М.га 2 дона алкоголли ичимликни сотган вақтида ушланган.

Тезкор тадбир ходимлари томонидан ушбу савдо дўконидан тегишли кирим ҳужжатлари бўлмаган турли номдаги 1 минг 997 дона алкоголь маҳсулотлари ашёвий далил сифатида олинган.

Шу каби яна бир ҳолат, Департаментнинг Урганч тумани бўлими томонидан ўтказилган тезкор тадбирда ҳам аниқланган.

Унга кўра, тумандаги «Н.Б.» МЧЖга қарашли савдо дўконида 55 турдаги жами 1 052 қалбаки акциз маркали алкоголь маҳсулотлари сотувга қўйилганлиги аниқланиб, ушбу маҳсулотлар ашёвий далил сифатида олинган.

«Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда», — дейилади департамент хабарида.