Видеодан кадр

Хоразм ва Андижон вилоятлари умумий қиймати 460 миллион сўм бўлган табиий газдан ноқонуний фойдаланиш ҳолатлари фош этилди. Бу ҳақда «Ҳудудгазтаъминот» АЖ ахборот хизмати хабар берди.

Маълум қилинишича, Хоразм вилоятининг Ҳазорасп туманида газ таъминоти филиали комплаенс назорат тузилмалари ва ҳамкор ташкилотлар иштирокида ўтказилган назорат тадбирлари давомида табиий газдан ноқонуний фойдаланиш ҳолати аниқланган.

Хусусан, туманнинг «Каврак» МФЙда истиқомат қилувчи фуқаро М. А. хонадонидаги электрон газ ҳисоблаш ускунасидан ташқари резина шланг орқали тармоққа уланиб, табиий газдан ўғринча фойдаланиб келган. Мазкур ҳолат юзасидан далолатнома тузилиб, 232 миллион 439 минг сўмлик зарар қайта ҳисоб-китоб қилинган.

Юқоридаги каби тадбирлардан яна бири «Ҳудудгаз Андижон» ГТФ комплаенс назорат тузилмалари, шаҳар газ таъминоти бўлими, Ўзенергоинспекция ва ҳуқуқ-тартибот органлари ҳамкорлигида Андижон шаҳрида ўтказилган.

Унда шаҳарнинг «Ўрикзор» МФЙ Бобуршоҳ кўчасида жойлашган «М.С.Д.» МЧЖга қарашли савдо дўкони биносида табиий газдан фойдаланиш ҳолати ўрганилганда, тегишли шартнома ва лойиҳа-техник ҳужжатларисиз тармоққа уланиб, «зангори ёқилғи»дан ноқонуний фойдаланиб келинаётгани аниқланган.

Ушбу ҳолат бўйича ҳам тегишли далолатнома тузилиб, 228 миллион 153 минг сўмлик зарар қайта ҳисоб-китоб қилинган.