11 февраль куни Мумбай полицияси террорчилар бош вазир Нарендра Моди самолётига ҳужум қилиши мумкинлиги ҳақида сигнал олди, деб хабар бермоқда «Hindustan Times» нашри.

Таъкидланишича, теракт ҳақидаги хабарлар Мумбайнинг Чембур туманидан қилинган қўнғироқлардан бирида аниқланган. Қўнғироқни амалга оширган шахс хавфсизлик ходимлари томонидан ушланганда, унинг руҳий хаста эканлиги ойдинлашган. Теракт хабари ёлғон ёки ростлиги ҳақида аниқ маълумотлар йўқ.

«Полиция назорат хонасига келиб тушган қўнғироқдан сўнг, барча хавфсизлик кучлари огоҳлантирилди ҳамда зарурий чора тадбирлар кўрилди. Гумонланувчи қўлга олиниб, дастлабки тергов ҳаракатлари бошлаб юборилган», — дейилади Мумбай полицияси баёнотида.

Мазкур ҳолат, бош вазир Нарендра Модига қилиниши мумкин бўлган биринчи суиқасд хабари эмас. Эҳтимолий ҳужум ҳақидаги хабар 2024 йилнинг декабрь ойида ҳам хавфсизлик кучлари томонидан қайд этилган ва ҳолат назоратга олинган эди.

Маълумот учун, 12 февраль куни Ҳиндистон бош вазири Нарендра Моди президент Дональд Трампнинг таклифига биноан АҚШга бориши режалаштирилган.