Фаластиннинг ҲАМАС ҳаракати 17 декабрь куни Қатарда ўт очишни тўхтатиш бўйича жиддий ва ижобий музокаралар ўтказилганини маълум қилди. Бу ҳақда «Anadolu» хабар берди.

Музокаралар Қатар ва Миср давлатлари ҳомийлигида ўтказилган. «Ўт очишни тўхтатиш ва асирларни айирбошлаш тўғрисидаги келишувга эришиш фақат босқинчи янги шартлар қўймаган тақдирдагина мумкин бўлади», — дейилади ҲАМАС баёнотда.

2023-йил ноябрь ойида ҲАМАС ва Исроил маҳбусларни айирбошлаб Ғазо секторида вақтинчалик ўт очишни тўхтатишга эришган эди. Исроил тахминан бир ҳафта давом этган ўт очишни тўхтатиш келишувидан сўнг Ғазога ҳужумларини қайта бошлаган. Ҳозирга келиб ҲАМАС юзга яқин исроиллик асирни ушлаб тургани айтилмоқда.

Музокаралардан хабардор манбаларга таяниб, «The Jerusalem Post»нинг хабар беришича музокара давомида сезиларли ютуқларга эришилган. Маълум қилинишича, Ғазо секторидаги ўт очишни тўхтатиш ва гаровга олинганларни озод қилиш бўйича келишувга бир ой ичида эришиш мумкин.

ҲАМАСни хавотирлантираётган асосий жиҳат шундаки, Трамп АҚШ президенти лавозимини расман эгаллаганидан кейин 40-60 кун давом этиши тахмин қилинган келишувнинг бир босқичида унинг бузилиши эҳтимоли мавжуд. ҲАМАС шу сабабли АҚШ президентининг инаугурациясига қадар Исроил билан шартнома тузишга ҳаракат қилиб кўради.