Фото: Gettyimage.com

«Манчестер Сити» бош мураббийи Хосеп Гвардиола Англия Премьер Лигасининг 26-турида «Ливерпул»га қарши ўйиндан сўнг янги футболчиларнинг ўйини ва жароҳат олган ҳужумчи Эрлинг Ҳоланднинг йўқлиги ҳақида ўз фикрларини билдирди. «Ливерпул»га қарши баҳсда «Манчестер Сити» 0:2 ҳисобида мағлуб бўлди.

Испаниялик мутахассис ўзбекистонлик ҳимоячи Абдуқодир Ҳусановнинг ўйинини юқори баҳолади. «Ҳусанов қандай ўйнади? У Мадридда ҳам жуда яхши ўйнади, у ўнг қанот ҳимоячиси сифатида Винини назорат қилди. Бугун ҳам худди шундай тезкор ва интизомли ўйин кўрсатди. Албатта, у ҳали ўсиши керак, лекин жуда катта салоҳиятга эга», — дея таъкидлади мураббий.

Шунингдек, у Нико Гонсалес ва Мармушнинг ҳам ҳаракатлари ҳақида тўхталиб ўтди. «Нико ва Мармуш ҳам яхши ўйнашди, лекин жисмонан кучли жамоага қарши ўйнаш уларга осон бўлмади», — дея қўшимча қилди у.

Маълумот учун, ўзбекистонлик ҳимоячи Абдуқодир Ҳусанов, ярим ҳимоячи Нико Гонсалес ва ҳужумчи Мармуш қишки трансфер ойнасида «Манчестер Сити» таркибига қўшилди. «Манчестер Сити»нинг норвегиялик ҳужумчиси Эрлинг Ҳоланд эса жароҳати сабаб «Ливерпул»га қарши ўйинда иштирок эта олмади.

Гвардиола Эрлинг Ҳоланднинг жароҳати ҳақида гапирар экан, унинг қачон сафга қайтиши аниқ эмаслигини айтди. «Ҳоланд чоршанба куни қайтадими? Билмайман. Биз натижага эриша олмаганимизни фақат унинг йўқлиги билан боғлаш нотўғри бўларди. Бу бошқа футболчиларга нисбатан адолатсизлик бўлади. Биз кўпроқ гол ура олардик... Умуман олганда, ҳаммаси яхши», — деди Гвардиола.