Истам ИБРОҲИМОВ/«Халқ сўзи». Нечоғли ғайритабиий туюлмасин, шу пайтга қадар Ғиждувонда маданият маркази йўқ эди. Ниҳоят, туман маданият соҳаси ходимларининг, санъатсеварларнинг кўп йиллик орзуси ушаладиган бўлди. Чорсу маҳалласида қўш қаватли замонавий бино қад ростлаяпти.

— Маданий-маърифий тадбирлар ўтказиш, аҳолининг бўш вақтини мазмунли ташкил этишда бу марказ алоҳида ўрин тутади, — дейди маданият соҳасида узоқ йиллардан буён фаолият кўрсатиб, элда обрў-эътибор топган меҳнат фахрийси Ражаб Авезов. — Қолаверса, бу марказ ёшларнинг иқтидорини юзага чиқаришда асқатади. Умид қиламизки, маданият ва санъат соҳасидаги энг яхши анъаналарнинг давомчилари майдонга чиқади.

Яқин кунларда фойдаланишга топширилиши кутилаётган марказда халқ ҳаваскорлик жамоалари, ёшларнинг амалий ва тасвирий санъат соҳасида ўз маҳоратларини оширишлари учун зарур барча қулайликлар яратиляпти. Салкам бир гектарли марказда кинотеатр, томоша зали, турли тўгараклар фаолият юритади. Бу ерда бир пайтнинг ўзида 200 нафардан зиёд ўғил-қиз маданият ва санъатнинг у ёки бу йўналиши билан шуғулланиши мумкин. Ўттиз нафарга яқин ижодий ходим, педагог уларга сабоқ беради.

Таъкидлаш керакки, бу иншоот давлатимиз раҳбарининг 2024 йилнинг 31 май – 1 июнь кунлари Бухоро вилоятига қилган ташрифи самарасидир. Ўшанда Президентимиз Ғиждувонни ижтимоий-иқтисодий ривожлантириш, туман марказининг меъморий қиёфасини янгилаш юзасидан тегишли топшириқлар берган, «Бухоро агрокластер» пахта-тўқимачилик кластерининг маданият маркази барпо этиш борасидаги ташаббусини қўллаб-қувватлаган эди.