Бош прокуратура ҳузуридаги Департаментнинг Бухоро шаҳри бўлими томонидан тезкор тадбир ўтказилди, деб хабар бермоқда Иқтисодий жиноятларга қарши курашиш департаменти.

Унда айтилишича, ўтказилган терговга қадар текширув давомида фуқаро Ғ.С. «Чорбахосса» МФЙ ҳудудидаги новвойхонада тижорат мақсадида умумий фойдаланишдаги газ тармоғига ўзбошимчалик билан уланиб, 200 миллион сўмлик табиий газдан ноқонуний фойдаланганлиги фош қилинган.

Шу каби яна бир ҳолат департаментнинг Сардоба тумани бўлими томонидан ўтказилган терговга қадар текширувда ҳам аниқланган.

Унга кўра, фуқаро «Б.С.» фермер хўжалиги масъул шахслари тижорат мақсадида умумий фойдаланишдаги электр тармоғига ўзбошимчалик билан уланиб, 128 миллион сўмлик электр энергиясидан ноқонуний фойдаланганлиги маълум бўлган.

Бундан ташқари, департаментнинг Тошкент тумани бўлими ходимлари томонидан ўтказилган терговга қадар текширувда ЯТТ «Д.Д.» хонадонидаги новвойхонасида тижорат мақсадида газ тармоғига тўғридан-тўғри уланиб, 127,3 миллион сўмлик табиий газдан ноқонуний фойдаланганлиги аниқланган.

Ҳозирда мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари бошлаб юборилган.