Марказий банк томонидан 2025 йилнинг 1 январидан 31 декабригача амал қиладиган, битта жисмоний шахсга бериладиган банк карталари сонини чеклаш бўйича вақтинчалик тартиб ишлаб чиқилди. Бу ҳақда «Spot» нашри ўз манбасига таяниб хабар қилган.

Унга кўра, банклар томонидан битта фуқарога (битта ЖШШИРга) эмиссия қилинадиган карталар сони битта банкда 5 тагача, барча банкларда эса 20 тагача чекланади. Мазкур талаб виртуал ва кобейджинг карталарни ҳам ўз ичига олади, бироқ чет эл валютасида очилган карталарга нисбатан татбиқ этилмайди.

Ушбу тартиб банк карталари билан боғлиқ шубҳали (фрод) операцияларнинг олдини олиш, фирибгарлик схемаларида жисмоний шахсларга тегишли ҳисобварақлар ва банк карталари иштирокини камайтириш мақсадлари билан боғлиқ.

Фуқаролар номига кўп миқдорда очилган банк карталарини таҳлил қилиш жараёнида, мазкур банк карталарининг бир қисмидан фирибгарлик мақсадларида фойдаланилаётганлиги аниқланган. Аксарият ҳолатларда карта эгасининг бундан хабари бўлмайди.

Таъкидлаш жоиз, 2024 йилнинг ноябрида Марказий банк битта жисмоний шахсга карталар сонини битта банкда 5 тагача белгилаш масаласи кўрилаётгани ҳақида хабар қилган эди.