Фото: Иллюстратив фото

Англияда ёзги трансферлар ойнаси ёпилишига 19 кун қолди. Бу кўп вақт эмас, аммо Премьер-лига баҳслари келгуси ҳафтадан старт олади. Шу боис кўпчилик клублар трансфер режаларининг 90 фоизини якунлаган. Биз эса Европа грандларининг ёздаги ҳаракатларини таҳлил қилишни бошлаймиз. Биринчи навбатда «Ливерпул» ҳақида.

Кетганлар

Ёзда «Ливерпул» сафини 9 футболчи тарк этди:

Луис Диас — «Бавария»га, 70 млн евро

Дарвин Нуньес — «Ал-Ҳилол», 53 млн евро

Жарелл Куанса — «Байер», 35 млн евро

Куивин Келлехер — «Брентфорд», 14.8 млн евро

Трент Александер-Арнольд — «Реал Мадрид», 10 млн евро

Тайлер Мортон — «Лион», 10 млн евро

Нат Филлипс — «Вест Бромвич», 3.5 млн евро

Ярош Витезслав — «Аякс», ижара

Харви Дэвис — «Кроули», ижара

Айнан Диас ва Александер-Арнольд кетиши жамоанинг чап қанот ҳужуми ҳамда ўнг қанот ҳимоясини сезиларли кучсизлантириши мумкин эди.

Янги келганлар

Арне Слот қўл остида «мерсисайдликлар» трансфер бозорида фаол бўлиб, катта маблағ сарфлади:

Флориан Вирц — «Байер», 125 млн евро (АПЛ рекорди)

Юго Экитике — «Айнтрахт», 80 млн евро

Милош Керкез — «Борнмут», 47 млн евро

Жереми Фримпонг — «Айнтрахт», 40 млн евро

Армин Печи — «Пушкаш», 1.8 млн евро

Фредерик Вудман — «Престон», эркин агент

Гиорги Мамардашвили — «Валенсия», 29 млн евро

Асосий трансферлар таҳлили

Жереми Фримпонг (24 ёш, Нидерландия, ўнг ҳимоячи)
Александер-Арнольд ўрнини тўлдириш учун олинган. Фримпонг тезкор, дриблингда яхши, юқори босим остида ҳам тўпни назорат қила олади. Арнольддан фарқли ўлароқ, у марказдан эмас, чизиқ бўйлаб ҳужум қилади.

Флориан Вирц (22 ёш, Германия, ҳужумкор ярим ҳимоячи)
АПЛ тарихидаги энг қиммат трансфер — 125 млн евро. Вирц креатив ярим ҳимоячи сифатида жамоага яратувчанлик қўшиши кутилмоқда. У «ёлғон тўққизлик» ёки қанотда ҳам ўйнай олади.

Юго Экитике (23 ёш, Франция, марказий ҳужумчи)
Бундеслигада ўтган мавсум 22 гол ва 12 ассист билан ёрқин ўйнаган. Ҳар 107 дақиқада голли ҳаракат. Нуньесдан фарқли равишда пасларда ҳам самарадор.

Милош Керкез (22 ёш, Венгрия, чап ҳимоячи)
Робертсоннинг жароҳати ва Цимикаснинг ноаниқ келажаги туфайли олинган. Чап қанотда юқори тезлик ва чидамлилик билан танилган, заруратда «wing-back» ёки ярим ҳимоячи сифатида ҳам фойдаланилиши мумкин.

Арне Слот қўл остида «Ливерпул» ёзда 290 млн евродан кўпроқ сарфлаб, таркибини жиддий кучайтирди. Кўпчилик экспертлар жамоани янги мавсумда АПЛ чемпионлиги учун асосий номзод сифатида кўрмоқда. Эндиликда савол битта — ушбу инвестициялар чемпионликка олиб келадими?