Ўзбекистон Республикаси Президенти Ш.Мирзиёев жорий йилнинг 10 февраль куни Жиззах вилоятига ташрифи давомида вилоятда янги ташкил этилган саноат корхоналари билан танишиш жараёнида олдин фаолият кўрсатган, бугунги кунда ишламай турган конларни қайта ўзлаштириш, қурилиш, энергия ва нодир металлар соҳасидаги 200 га яқин конларни ўзлаштириш топшириғини берган эди.

Мазкур топшириқлар ижросини таъминлаш мақсадида Фориш туманидаги “Уч-қулоч полиметалл конини комплекс ўзлаштириш” инвестициявий лойиҳасининг амалга оширилишига старт берилди. 

Конни очилиш маросимида Жиззах вилоят ҳокими Эргаш Салиев, Тоғ-кон саноати ва геология вазири ўринбосари Аъзам Қодирхонов, “Олмалиқ КМК” АЖ Бошқарув раиси Абдулла Хурсанов, “Esan Eczacibasi” компанияси бош директори Саваш Шахин ҳам вилоят, туман фаоллари иштирок этишди.

Уч-қулоч конини ўзлаштириш ва тиклаш, хорижий инвесторлар билан ҳамкорлик қилиш ва камида 600 иш ўрни яратиш лойиҳасига 200 миллион АҚШ долларлик маблағлар сарфланиши кўзда тутилган. Бу каби йирик лойиҳалар Ўзбекистоннинг полиметалл рудаларни қазиб олиш ва кончилик салоҳиятидан унумли фойдаланиш, хом-ашё ва тайёр маҳсулот ишлаб чиқариб, экспорт қилиш қувватларини оширишга қаратилганлигини таъкидланди.

- Мазкур лойиҳани амалга ошириш бўйича Ўзбекистон Республикаси Тоғ-кон саноати ва геология вазирлиги, Олмалиқ кон-металлургия комбинати ҳамда Туркиянинг “Esan Eczacibasi” компанияси ўртасида 3 томонлама шартнома тузилган бўлиб, қўшма корхона ташкил этилади, - дейди тадбирда сўзга чиққан Жиззах вилоят ҳокими Эргаш Салиев. - Конда разведка ишларини олиб бориш, рудани қазиб олиш ва қайта ишлаш амалга оширилади. Кондан йилига очиқ усулда 500 минг тонна полиметалл руда қазиб олинади. Шунингдек, лойиҳа доирасида йилига 500 минг тонна рудани қайта ишлашга мўлжалланган замонавий бойитиш фабрикаси қурилади.

Бойитиш фабрикасида йилига 5,4 минг тонна рух концентрати ҳамда 18,4 минг тонна қўрғошин концентрати олинади. Лойиҳа бўйича мавжуд майдаланган рудалар омбори билан майдалаш-ортиш узели тўлиқ таъмирланади. Ташқи муҳандислик коммуникациялари барпо этилади. Автомобиль ва темир йўллар реконструкция қилинади.

Толибжон ЭРГАШЕВ, “Халқ сўзи”.