Хитой Халқ Республикасининг Шенси провинциясида «Бир макон, бир йўл» халқаро ҳамкорлик ташаббуси доирасида бизнес-форум ва савдо ярмаркаси бўлиб ўтди.

Тадбирда Хитой, Россия, Япония, Покистон, Мексика каби дунёнинг 12 мамлакатидан элчилар, ҳудудий бошқарув органлари раҳбарлари ҳамда йирик тадбиркорлик субъектлари вакилларидан иборат 4 минг нафардан зиёд иштирокчи офлайн ва онлайн тарзда иштирок этди.

Унда Фарғона вилояти ҳокими ўринбосари Иқболжон Эргашев томонидан вилоятнинг инвестициявий ҳамда савдо-иқтисодий салоҳияти бўйича тақдимот ўтказилди.

Форум доирасида Хитойнинг аҳолиси қарийб 5 миллион нафардан зиёд бўлган Вейнан шаҳри халқ ҳукумати ҳамда Фарғона вилоятининг Қува тумани ҳокимлиги ўртасида онлайн тарзда Инвестициявий, савдо-иқтисодий ҳамкорлик юзасидан англашув меморандуми имзоланди.

Фарғона вилояти ҳокимлиги ахборот хизматининг маълум қилишича, шу йилнинг июнь ойида 200 нафарга яқин тадбиркордан иборат Хитой делегациясининг Фарғона шаҳрига ташрифи кутилмоқда. Ташриф давомида Фарғона-Хитой тадбиркорлари иштирокида бизнес-форум ташкил этилиши режалаштирилган.

Ботир Мадиёров, «Халқ сўзи».