Ботир МАДИЁРОВ/«Халқ сўзи». Маълумки, жорий йилнинг 13-20 апрель кунлари Фарғона вилояти ҳокими Хайрулло Бозоров бошчилигидаги вилоят делегацияси амалий ташриф билан Хитойда бўлди. Хитойнинг бир қатор провинциялари, йирик ишлаб чиқариш компанияларида ўтказилган юзма-юз мулоқотларда икки томонлама манфаатли ҳамкорлик бўйича келишувларга эришилди.

Бу келишувларнинг амалий самараси сифатида куни кеча Хитойнинг Хотан провинциясининг 10 нафарга яқин расмийлари ҳамда 30 дан зиёд йирик компаниялари раҳбарлари Фарғонага ташриф буюрди. Кенг қамровли мулоқотлар давомида Фарғона — Хотан инвестиция форуми бўлиб ўтди.

— Форумнинг асосий мақсади вилоятимизнинг тадбиркорлик соҳасидаги салоҳиятини намойиш этишга қаратилган, — дейди Фарғона вилояти Инвестициялар, саноат ва савдо бошқармаси бошлиғининг биринчи ўринбосари Азимжон Юлдашев. — Шунингдек, ушбу тадбир орқали хитойлик тадбиркорларни янги инвестиция лойиҳаларига жалб қилиш ҳамда Ўзбекистон — Хитой ўртасидаги савдо алоқаларини янада жадаллаштириш мақсад қилинган.

Айтиш жоиз, форум доирасида инвестиция лойиҳаларини бир неча баробарга ошириш режалаштирилди ва бу борада амалий саъй-ҳаракатларга киришилди. Шу билан бирга, яқин вақт ичида фарғоналик тадбиркорлар делегациясининг Хотан провинциясига сафарини уюштиришга келишиб олинди.