Архив фото

Америка Қўшма Штатлари президент Дональд Трамп даврида воқеалар тез ўзгаради. Бир неча кун олдин Украина президенти Владимир Зеленскийни «диктатор» деб атаган Трамп энди бунақа сўзни айтганидан тонди. Трамп Зеленскийни ҳурмат қилишини айтиб, уни алқаган.

Украина президенти АҚШнинг Украинанинг ноёб минерал ресурсларидан фойдаланиш тўғрисида битим имзолаш учун ҳафта охирида Вашингтонга келади. Битимнинг биринчи лойиҳаси Украинани мустамлака давлатдек талаш тушинилганди. Шу боис Зеленский ўз миллатининг бойлигини сота олмаслигини таъкидлаб, уни имзолашдан бош тортганди. Энди Киев вайрон бўлган шаҳарлар ва инфратузилмани тиклаш учун минерал захиралардан фойдаланиш бўйича АҚШ билан ҳамкорлик қилишга яқин турибди.

Зеленскийнинг таъкидлашича, ушбу битим Украинанинг келажакдаги хавфсизлиги учун муҳим.

Ўз навбатида, Трамп «Биз шартнома имзолаймиз, бу жуда катта келишув бўлади», деди.

Шундай бўлса-да Европада АҚШ ва Россия ҳамкорлигидан қўрқув бор. Улар Путиннинг иштаҳаси энди Болтиқ давлатларига нисбатан уйғониб қолишидан қўрқади. Франция президенти Эммануэль Макрон ва Буюк Британия бош вазири Кир Стармер ушбу ҳафта Трамп билан учрашувда кескин фикр билдиришган.

«Биз буни тўғри қабул қилишимиз керак. Буюк Британияда Иккинчи жаҳон урушидан кейин машҳур одат бор. Биз тинчликни таъминлашимиз керак ва бунинг ҳозир айни вақти. Тажовузкорларни мукофотлайдиганлардан эмасмиз», — дейди Стармер.

Макрон Трампга Россия раҳбари билан битим тузишнинг иложи йўқлигини ишонтиришга ҳаракат қилган. Макрон Украинадаги уруш бошланишидан олдин Путин билан 7 соатлаб гаплашганини, ҳар қандай тажовузни рад этиб, охири Украинага уруш очганини айтиб берар экан, Трампга Путиннинг виждонига ишониш учун ҳеч қандай сабаб йўқлигини эслатган.