Фото: РИА «Новости»

Европа Комиссияси навбатдаги санкциялар пакетида Россия ядро сектори ёки унинг вакилларига нисбатан санкциялар қўллаш режаларидан воз кечди. Бу ҳақда «Politico» нашри уч дипломатга таяниб хабар бермоқда.

Европа Иттифоқи ижроия органи дастлаб Европа Иттифоқи давлатларига Россиянинг фуқаролик ядро секторига қарши санкцияларни ишлаб чиқишга ҳаракат қилишини айтганди. Ўтган ҳафта Европа Иттифоқи етакчиларининг учрашуви олдидан Украина президенти Владимир Зеленский блокни «Росатом»га қарши санкциялар жорий этишга чақирган.

Аммо, нашр манбаларига кўра, бу режа барбод бўлган. «Афсуски, ядро сектори бу пакетга киритилмаган», деди Европа Иттифоқи дипломатларидан бири.

Нашрнинг қайд этишича, Венгрия узоқ вақтдан бери ядро секторига қарши санкцияларга қарши бўлиб, ўзининг «Росатом»га қарамлигига ишора қилади. Венгриянинг потенциал ветосини енгиб ўтиш учун Европа Иттифоқи «Росатом» ва бошқа компанияларнинг алоҳида ходимларини рўйхатга киритишни кўриб чиқди, аммо охир-оқибатда бундай ҳам қилмасликка қарор қилган.

Шу йилнинг 5 февраль куни Украина президенти Владимир Зеленский Миллий хавфсизлик ва мудофаа кенгашининг Россия ядро саноатига қарши санкциялар бўйича қарори кучга кирганини эълон қилди. Ҳужжатга кўра, Россиянинг 200 та юридик шахсига, жумладан, «Росатом»га нисбатан санкциялар жорий этилган.

Бунга жавобан «Росатом» давлат корпорацияси ядро энергетикаси сиёсатдан ташқарида бўлиши кераклигини таъкидлади.

Аввалроқ, «Reuters» агентлиги Европа Иттифоқи мамлакатлари  «махсус ҳарбий операция» бошланганининг бир йиллиги — 24 февралга қадар Россияга қарши янги санкцияларни қабул қилишга улгуриши ҳақида хабар берган эди.