Al Jazeera

АҚШ давлат котиби Энтони Блинкен Эрон ва "Ҳизбуллоҳ" яқин 24-48 соат ичида Исроилга ҳужум қилиши мумкинлигидан огоҳлантирди.

АҚШнинг “Axios” нашри томонидан тасдиқланмаган ҳисобот душанба куни эълон қилинди. Эрон ва “Ҳизбуллоҳ” ўтган ҳафта ҲАМАС ва “Ҳизбуллоҳ”нинг юқори етакчилари ўлдирилгани учун ўч олишга ваъда берган эди. Исми ошкор қилинмаган уч нафар манбадан келтирилган иқтибосга кўра, Блинкен G7 га Исроилга қарши душанба куниёқ ҳужум бошланиши мумкинлигини маълум қилди. Шунингдек, у Вашингтон ҳужумларнинг аниқ вақтини билмаслигини қўшимча қилган.

АҚШ давлат котиби ҳамкасбларига қарама-қаршиликни тўхтатишга ва кескинлашувнинг олдини олишга умид қилишини айтиб, уларни ҳам томонларга дипломатик босим ўтказишга чақирган.

Канада, Франция, Германия, Италия, Япония ва Буюк Британияни ўз ичига олган G7 душанба куни баёнот эълон қилиб, Яқин Шарқдаги мазкур ҳолатдан чуқур хавотир билдирди ва барча томонларни вазминликка чақирди. "Ҳеч бир мамлакат ёки миллат кейинги кескинлашувдан фойда кўрмайди", дейилади баёнотда.

Маълумот учун, Исмоил ҳания ўлдирилганидан кейин АҚШ жавоб ҳужумларини инобатга олиб, Яқин Шарққа қўшимча ҳарбий кучлар юборди.

АҚШ Марказий қўмондонлиги раҳбари генерал Майкл Курилла душанба куни Исроил армияси билан эҳтимолий ҳужум олдидан тайёргарликни якунлаш учун мамлакатга келади. Бу ҳақда Axios нашри хабар берди.