Уругвайнинг собиқ президенти, халқ орасида «Эл Пепе» лақаби билан машҳур бўлган Хосе Мухика 89 ёшида вафот этди. Бу ҳақда мамлакатнинг ҳозирги президенти Яманду Орси ижтимоий тармоқдаги саҳифаси орқали маълум қилди.

У Мухикани «президент, фаол, йўл кўрсатувчи ва етакчи» деб таърифлади. 2024 йил баҳорида Мухикада қизилўнгач саратони аниқланган эди ва у узоқ вақт муолажалар олган эди. Шифокорлар 2024 йилнинг кузида саратон ҳужайраларининг камайганини билдирган бўлса-да, 2025 йил бошида касаллик қайта авж олган.

«Тўғрисини айтсам, мен ўляпман. Ҳар бир жангчининг ҳордиқ чиқаришга ҳақи бор,» – деган эди у «Busqueda» журнали билан ўтказилган сўнгги интервюсида.

Мухика 2010–2015 йиллар оралиғида Уругвай президенти сифатида фаолият юритган. У мамлакатни дунёнинг энг эркин жамиятларидан бирига айлантиришда муҳим рол ўйнади. Унинг президентлиги даврида Уругвайда марихуана истеъмоли, бир жинсли никоҳ ва ҳомиладорликни ихтиёрий тўхтатиш қонунийлаштирилди. Шунингдек, у алтернатив энергия соҳасида ҳам Уругвайни етакчи мамлакатлар қаторига олиб чиққан.

Пепе Мухика оддий ҳаёт тарзи билан бутун дунёга танилган эди. У президентлик саройида эмас, балки оддий бир фермада яшаган ва ўз маошининг катта қисмини хайрия ишлари учун берган. «Биз бойлик ҳақида жуда кўп ўйлаймиз, бахт ҳақида эса кам. Ҳаёт чиройли саргузашт, лекин у жуда тез ўтиб кетади», – дея у ҳаёт фалсафасини сўнгги интервюсида ифодалаган.

Мухика 1960 йилларда «Тупамарос» деб номланган марксистик-ленинчи шаҳарлик партизан ҳаракатининг асосчиларидан бири бўлган. Улар дастлаб бойлардан олиб камбағалларга бериш билан машҳур бўлган бўлса, кейинчалик уларнинг ҳаракатлари портлашлар, ўғирлашлар ва сиёсий қотилликларгача етиб борган.

Озодликка чиққач, Мухика сиёсий фаолиятга қайтади ва 1989 йилда «Халқ иштироки ҳаракати» партиясини ташкил қилади. Кейинчалик у парламент аъзоси, сенатор ва қишлоқ хўжалиги вазири лавозимларида ишлайди. У фақат бир муддат президент бўлган. Бу эса Уругвай қонунларига мувофиқдир.

«Эл Пепе» Уругвай халқи учун ота каби бўлган ва 20 майда 90 ёшга кирган бўларди.