Фото: UzChess Cup

Шу йилнинг 5-15 июнь кунлари дунёнинг кучли шахматчилари Тошкентда жам бўлади. Гап шундаки, айни шу кунлар мамлакатимиз мукофот жамғармаси 166 минг АҚШ долларини ташкил этувчи «UzChess Cup» халқаро турнирига мезбонлик қилади.

Ушбу нуфузли мусобақа 3 гуруҳда ўтказилади. Яъни «Masters» гуруҳида рейтинги 2700 ва ундан юқори, «Challengers» гуруҳида рейтинги 2600 ва ундан юқори, «Futures» гуруҳида рейтинги 2500 ва ундан юқори шахматчилар совринли ўринлар учун беллашади.

Турнир ташкилий қўмитаси маълумотига кўра, «Masters» гуруҳида Нодирбек Абдусатторов, Жавоҳир Синдоров, Нодирбек Ёқуббоев (Ўзбекистон), Видит Сантош Гужрати (Ҳиндистон), Парҳам Магҳсоодлоо (Эрон), Шахрияр Мамедяров (Озарбайжон), Александр Грищук (Россия), Юй Янъи (Хитой), Ричард Раппорт (Руминия) ва Алексей Сарана (Сербия) ғолиблик учун кураш олиб боради.

«Challengers» гуруҳида Жаҳонгир Воҳидов, Шамсиддин Воҳидов (Ўзбекистон), Александр Предке, Александр Инджик (Сербия), Максим Матлаков (Россия), Мустафа Йилмаз (Туркия), Александр Донченко (Германия), Айдин Сулейманли (Озарбайжон), Абхиджит Гупта (Ҳиндистон), Евгений Романов (Норвегия) ўз имкониятини синаб кўради.

«Futures» гуруҳида эса Муҳиддин Мадаминов, Саидакбар Сайдалиев, Муҳаммадзоҳид Суяров, Ҳумоюн Бегмуродов (Ўзбекистон), Бардия Данешвар (Эрон), Виталий Бернадский (Укарина), Вугар Расулов (Озарбайжон), Сергей Тивиаков (Нидерландия), Виталий Сивук (Швеция) ва Михаил Никитенко (Беларусь) ўзаро беллашади.

Ҳар бир ўйин бошида шахматчиларга 40 та юриш учун 90 дақиқа, 41-юришдан ўйин охиригача эса қўшимча 30 дақиқа берилади ва ҳар бир юриш учун 30 секунд вақт қўшиб борилади.