Дубайнинг йирик порт оператори — DP World жума куни компания раиси ва бош ижрочи директори Султон Аҳмад бин Сулайем истеъфога чиққанини маълум қилди. Бу қарор унинг марҳум молиячи Жеффри Эпштейн билан эҳтимолий алоқаларига оид ҳужжатлар эълон қилинганидан кейин кучайган босим фонида қабул қилинди, деб ёзмоқда “Reuters”.

Маълум қилинишича, DP World директорлар кенгаши раиси этиб Эсса Казим, гуруҳ бош ижрочи директори лавозимига эса Ювраж Нараян тайинланди. Казим айни пайтда Дубай халқаро молия маркази ҳокими ҳисобланади. Нараян 2004 йилдан буён компанияда ишлаб келади ва сўнгги вақтгача бош директор ўринбосари лавозимида фаолият юритган.

Султон Аҳмад бин Сулайем раҳбарлик қилган ташкилотга босим сўнгги кунларда янада ортаётган эди. Хусусан, Британия ривожланишни молиялаштириш агентлиги (“British International Investment”) ҳамда Канаданинг “La Caisse” пенсия жамғармаси DP World билан янги инвестицияларни вақтинча тўхтатишини билдирди. 13 февраль куни Британия агентлиги компания қарорини қўллаб-қувватлаб, Африкадаги савдо портларини ривожлантириш бўйича ҳамкорликни давом эттиришга умид билдирган. “La Caisse” ҳам компания “зарур чораларни кўргани”ни қайд этган.

Эпштейнга оид ҳужжатлар эълон қилиниши халқаро миқёсда жиддий оқибатларга сабаб бўлмоқда. Хабарларга кўра, “Goldman Sachs” компаниясининг бош маслаҳатчиси Кэти Руеммлер ҳам истеъфо беришини билдирган. Ҳужжатларда Эпштейн 2008 йилда вояга етмаган қизларни фоҳишаликка ёллаш айблови бўйича судланганидан кейин ҳам бин Сулайем билан ўн йилдан ортиқ яқин алоқада бўлгани тахмин қилинади. Эслатиб ўтиш жоиз, Эпштейн 2019 йил август ойида Нью-Йорк қамоқхонасида ўз жонига қасд қилиб вафот этган.

Маълумотларга кўра, DP World дунё контейнер юк айланмасининг тахминан 10 фоизини қайта ишлайди ва Канада, Перу, Ҳиндистон, Ангола каби давлатларда фаолият юритади. Компания 2023 йилдан буён “McLaren”нинг “Formula 1” жамоасига логистика ҳамкори сифатида ҳам хизмат кўрсатиб келмоқда.