UFC'нинг икки вазн тоифасида собиқ чемпиони, америкалик жангчи Даниэль Кормье ўзининг азалий рақиби Жон Жонс билан эҳтимолий кураш беллашуви ҳақида фикр билдирди. Унинг таъкидлашича, айнан кураш қоидаларида ўтадиган тўқнашув бир томонлама, яни ўз фойдасига ҳал бўлиши мумкин.

«Грэпплинг бўлса — билмадим. Аммо кураш масаласида мен Жон Жонсга қарши чиқишга тайёрман. Агар бизга кураш жанги ташкил қилиб беришса — мен ва Жон Жонс, эркин кураш, 2–3 дақиқалик даврлар билан — бу узоққа чўзилмайди. Бу тўлиқ устунлик билан якунланади», деди Кормье Red Corner MMA'га берган интервьюсида.

Кормье ва Жонс UFC октагонида икки марта тўқнаш келган. Илк жангда Жон Жонс ҳакамларнинг якдил қарори билан ғалаба қозонган бўлса, реваншда Кормье нокаут орқали мағлуб бўлган. Аммо кейинчалик иккинчи жанг натижаси Жонснинг тақиқланган модда бўйича допинг таҳлили ижобий чиққанидан сўнг бекор қилинган. Кормьенинг ММА'даги умумий натижаси — 22 ғалаба, 3 мағлубият ва 1 бекор қилинган жанг. Жон Жонс ҳисобида эса 28 ғалаба, 1 мағлубият ва 1 бекор қилинган беллашув бор.

Шу орада UFC чемпиони Ислом Махачев ҳам Кормье ва Жонс ўртасидаги эҳтимолий кураш жангига баҳо берди. Унинг фикрича, фақат курашда Кормье Жонсга қарши муносиб рақобат кўрсата олади.

«Жонс яхши курашади, лекин кураш — Кормьенинг табиий муҳити. У олимпия даражасидаги курашчи, бу эса жуда юқори савия», деди Махачев MMA Arena'га берган интервьюсида.

Айтиш жоиз, Кормье ва Жонс яқинда Россияда суратга олинаётган ALF Reality 3 спорт реалити-шоусида мураббий сифатида иштирок этган. Айни пайтда улар ўртасидаги кураш беллашуви RAF эркин кураш лигасида ўтиши мумкинлиги ҳақида миш-мишлар тарқалмоқда.