Буюк Британия Украинадаги уруш бошланганидан бери Россияга тегишли 25 миллиард фунт стерлингдан (деярли 30 миллиард евро) ортиқ активларни музлатиб қўйди. Бу ҳақда мамлакат Молия вазирлиги қошидаги Молиявий санкцияларни амалга ошириш бошқармаси (OFSI) 21 март куни маълум қилди. Лондон ва унинг иттифоқчилари Россияга нисбатан тарихдаги энг қаттиқ молиявий санкциялар жорий этилганини қайд этмоқда.

OFSI ҳисоботида қайд этилишича, 2022 йил феврал ойидаги тўлиқ миқёсли урушдан сўнг Россия тахминан 400 миллиард доллардан (475 миллиард еврога яқин) ортиқ маблағдан маҳрум бўлган. Бу мамлакатнинг тўрт йиллик мудофаа харажатларига тенг маблағни ташкил этади. Британия хазинасида таъкидланишича, бу санкциялар натижасида Россиянинг умумий молиявий ҳолати заифлашган ва федерал бюджет камида 2026 йилгача дефицитли бўлиб қолиши кутиляпти.

Молиявий босимлар фонида рубль қийматсизланди, ишчи куч етишмовчилиги, инфляциянинг юқори суръатда ўсиши ва қиммат кредитлар Россия иқтисодиётига янада оғирлик қилмоқда. Санкциялар Россия армиясини Эрон ва Шимолий Корея каби давлатлардан ҳарбий эҳтиёжлар учун маҳсулот сотиб олишга мажбур қилган.

Буюк Британия хазинасининг иқтисодий котиби Эмма Рейнолдс «Россиянинг Украинага бостириб киришига қарши кенг қамровли чоралар доирасида молиявий санкцияларни қатъий тарзда амалга оширишда давом этамиз», деди.

2024 йил 6 январда Британия парламенти аъзолари Россия активларини Украинага ўтказиш таклифини илгари сурди. Очиқ мактубда депутатлар Ғарб мамлакатларида музлатилган Россия активларини Киевга бериш орқали Россия ўз жиноятлари учун жавобгарликни ҳис қилиши лозимлигини таъкидлашди. Ушбу таклиф Британия парламентининг ўндан ортиқ аъзолари ҳамда Германия каби бошқа давлатлар депутатлари томонидан қўллаб-қувватланган.

Маълумотларга кўра, Ғарб давлатлари томонидан музлатилган Россия активларининг умумий қиймати 280 миллиард еврога етади, уларнинг асосий қисми Европа Иттифоқида сақланмоқда. ЕИда ушбу активларни мусодара қилиш ва уларни Украинага етказиш бўйича қарама-қарши фикрлар мавжуд. Айрим давлатлар бундай таклифни қўллаб-қувватласа, бошқалари фақат активлардан тушган фоизларни беришни маъқул кўрмоқда.

20 март куни Европа Иттифоқи томонидан Украинага яна 1 миллиард евролик молиявий ёрдам ажратилгани маълум бўлди. Ушбу кредитлар бўйича тўловлар Украина томонидан эмас, балки музлатилган Россия активларидан тушган фоизлар ҳисобига амалга оширилади.