Фото: AP

Украина президенти Владимир Зеленский қуролли можарога барҳам бериш учун мамлакатда президентлик сайловларини ўтказишга тайёрлигини маълум қилди. Бу ҳақда у АҚШ президенти Дональд Трамп билан бўлиб ўтган музокаралар якунлари бўйича ёпиқ йиғилишда маълум қилган, дея ёзмоқда “РБК-Украина”.

“Агар сайловлар аллақачон бўлиб ўтган бўлса, хурсанд бўлардим. Бу мавзуни аллақачон тугатиш учун”, — деган у.

Сиёсатчи сайловлар Украинадаги можарони ҳал қилишга ижобий таъсир кўрсатсагина ўтказиш истагини билдирди. Унинг фикрича, овоз бериш мамлакатдаги вазиятни беқарорлаштириши мумкин.

Зеленский Украина Россиянинг Қрим ва янги ҳудудлар устидан назоратини қонуний тан олишга рози бўлмаслигини яна бир бор таъкидлади. Шу билан бирга, у Киевнинг бу борадаги қадамларини муҳокама қилиш Москванинг позицияси Украинага аниқ бўлганидан кейин мумкин бўлишини билдирди.

Сиёсатчи 18 август куни Оқ уйда бўлиб ўтган шахсий учрашувида Трампни ҳудудлар масаласида кўндириш уринишлари ҳақида ҳам гапирди. Зеленский шунингдек, агар Киев Донецк Халқ Республикасидаги мустаҳкамланган ҳудудларни бой берса, Россия Қуролли Кучлари Харьков ва Днепропетровскга ҳужум бошлаши мумкинлигини қўшимча қилди.

Путин билан қаерда учрашмоқчи?

Зеленский Россия президенти Владимир Путин билан икки томонлама учрашув вариантлари сифатида бир қанча Европа давлатлари ҳақида гапирди. У музокаралар ўтказиш мумкин бўлган жойлар сифатида НАТОга аъзо бўлмаган Швейцария ва Австрияни тилга олди.

“Биз буни адолатли деб ҳисоблаймиз ва буни европаликлар таъкидладиларки, учрашув бетараф Европада бўлиши керак. Чунки можаро Европа қитъасида” — деган Украина президенти.

Сиёсатчи, шунингдек, АҚШ воситачилигида Россия етакчиси билан учрашувга тайёргарлик бошланганини маълум қилди. Унинг сўзларига кўра, яқин 7-10 кун ичида Киев кейинги музокаралар учун Вашингтондан хавфсизлик кафолатлари архитектураси ҳақида тушунчага эга бўлмоқчи.

Украина президенти девони раҳбари Андрий Ермак “Corriere dela Sera” нашрига берган интервьюсида учрашув ўтказиладиган жойлар рўйхатини Туркия ва Саудия Арабистони билан бирга кенгайтирди. Расмий, шунингдек, 1994 йилда имзоланган ядро қуролидан воз кечиш бўйича Будапешт меморандумига ўхшашлик келтириб, учрашувни Москва ва Будапештда ўтказиш имкониятини рад этди.

Зеленский Москванинг таклифини танқид қилди

Зеленский Киевнинг НАТОга кириши эвазига Исроил мисолида хавфсизлик кафолатларини талаб қилди. У, шунингдек, Европа давлатлари ва Қўшма Штатлар ўртасида мувофиқлаштириш зарурлигини таъкидлади.

“Бизга фақат ёрдам беришга тайёр бўлган давлатлардан хавфсизлик кафолати керак” — дейди у

Сиёсатчи, шунингдек, Россия ташқи ишлар вазири Сергей Лавровнинг Хитойни Украина хавфсизлиги кафолати сифатида жалб этиш таклифини ҳам танқид қилди. У Пекинни Киев хавфсизлиги масаласида ҳаракатсизликда айблади ва Будапешт меморандумига ишора қилиб, Хитойни ҳужжатни имзолаган давлат деб атади.

Будапешт меморандуми 1994 йилда фақат Россия, Украина, Буюк Британия ва АҚШ томонидан тузилган. Хитой меморандумни имзолаш ўрнига 1994 йил 4 декабрда ҳукумат баёнотини чиқариб, Киевга хавфсизлик кафолатларини берган.

Зеленский рус тилига давлат тили мақоми бериш таклифини танқид қилди

Учрашувда Зеленский журналистнинг саволига жавобан рус тилига давлат тили мақоми бериш таклифини танқид қилди. У Москвани можарони русийзабон аҳоли ҳуқуқларига оид шартлар билан ҳал қилишни мураккаблаштиришга уринаётганликда айблади.

“Бизда битта давлат тили бор — украин. Руслар хоҳлаган нарсани айтишлари мумкин” — дейди Зеленский

Шу йилнинг 6 июнь куни Сергей Лавров Украинадаги рус тилида сўзлашувчилар ҳуқуқларини тиклаш ниятида эканлигини маълум қилганди. Дипломат, шунингдек, Украинадаги тил муаммосини ҳал этиш узоқ муддатли тинчлик учун зарур шарт эканини айтди.

Украина баллистик ракеталарни оммавий ишлаб чиқаради

Зеленский Украинанинг “Фламинго” баллистик ракеталарини ишлаб чиқариш йўлга қўйилганини тасдиқлади, шунингдек, қуроллар муваффақиятли синовдан ўтказилганини маълум қилди. Унга кўра, “Фламинго”ни оммавий ишлаб чиқариш 2025 йил охири – 2026 йил бошида бошланади.

“Менимча, биз юзлаб ракеталарни қўллаш қобилиятига эга бўлмагунимизча, бу ҳақда кўп гапира олмаймиз”, — дейди у.

“Associated Press” хабарига кўра, “Фламинго” ракетаси 3 минг километргача масофани босиб ўтишга қодир, унинг жанговар каллаги эса 1,15 тоннани ташкил қилади. “Fire Point” ракетаси ишлаб чиқарувчисининг агентликка маълум қилишича, компания ҳозирда кунига биттадан “Фламинго” ишлаб чиқаради.