“Улуғбек юлдузи,” “Мафтунингман”, биринчи ўзбек овозли фильми “Азамат” каби машҳур фильмлардаги роллари, театрда саҳналаштирган қатор спектакллари билан ўзбек халқи юрагидан чуқур жой эгаллаган таниқли актёр ва режиссёр Аббос Бакиров 1910 йил 16 майда Андижонда туғилган. Ижодий фаолиятини 1931 йил ҳозирги З.М.Бобур номидаги Андижон вилоят мусиқали драма ва комедия театрида актёр сифатида бошлаган. Маҳкам полвон (“Боғбон қиз”), Қосим деҳқон (“Онтариш”), Муслимбой (“Ҳалима”) ва бошқа роллар унинг илк образлари саналади.

У 30 йилдан ортиқ вақт мобайнида Андижон театрида асосий режиссёр вазифасида фаолият олиб борган. Шунингдек, Аббос Бакиров кинода ҳам роллар ижро этиб, “Ўғиллар узоққа йўл олди”, “Ибн Сино” ва бошқа фильмларда иштирок этган. Шунингдек, Амир Олимхон (“Амироикнинг емирилиши”), Султон Маҳмуд (“Абу Али ибн Сино”), Юсуфбек хожи (“Ўткан кунлар”), Аббос (“Улуғбек юлдузи”), Аъзамхон (“Икки дил достони”) каби ролларни маромига етказиб ижро этган.
 

А.Бакиров режиссёр сифатида 40 дан ортиқ спектакл саҳналаштирган бўлиб, “Алишер Навоий”, “Шоҳи сўзана”, “Оғриқ тишлар”, “Муқимий”, “Холисхон”, “Нурхон”, “Нодира”, “Лайли ва Мажнун” кабилар шулар жумласидандир. Режиссёр 1970 йил Ҳамза номидаги Ўзбекистон Давлат мукофоти билан тақдирланган. У 1974 йил вафот этган.

Бугун Андижон ёшлар театри ва кинотеатрига Аббос Бакиров номи берилган.