Ҳар бир кўча ва хиёбони, ҳар бир ҳовлиси чаманзор тусини олган Наманган аҳли орзиқиб кутилган нафосат байрамини шоду хуррамлик билан кутиб олмоқда. Айтиш керакки, Ўзбекистон Республикаси Туризм ва спорт вазирлиги кўмагида бу йил олтмишинчи бор нишонланаётган гуллар сайлининг тадориги ҳар қачонгидан ўзгача бўлди. Айниқса, асосий тадбирлар ўтадиган Заҳириддин Муҳаммад Бобур номли маданият ва истироҳат боғи чинакам байрам ошёнига айланган. Бу ерда ўтқазилган 10 миллион тупдан ортиқ гул кўчатлари ўз жозибаси ва ифори билан дилларни тортади. Юздан ортиқ корхона ва ташкилотлар, профессионал ва ҳаваскор гулчилар томонидан ташкил этилган кўргазмаларга қараб тўймайсан киши-ҳар бири алоҳида мазмун, манзарага эга. Бугина эмас, тайёргарлик тадбирлари давомида бутун шаҳар ҳудуди гулу чечаклардан оловланди.

Кўҳна ва навқирон кент бугунги тонгни ўзгача жозиба билан кутиб олди. Ҳадемай халқаро фестивалнинг асосий тадбирлари бошланади. Дастурга мувофиқ катта сайлга шаҳарнинг ҳаво дарвозаси – аэропорт кўчасида сафланадиган гуллар билан безанган автомашиналар карвони ҳаракати билан старт берилади. Шаҳар кўчаларини тўлдириб ўтадиган карвонга жамланган техникалар сони 200 дан ортади. Тинчлик стелласи ҳудудида анжуманнинг тантанали очилиш маросими бўлиб ўтади. Унда хорижий давлатлар, мамлакатимиз пойтахти ва вилоятлардан келган меҳмонлар, вилоят жамоатчилиги вакиллари иштирок этадилар.

Тўққиз кун давом этадиган нафосат байрами ўзига кенг миқёсли маданий-маърифий ва кўнгилочар тадбирларни қамраб олгани билан аҳамиятга молик. Боғдаги гул кўргазмалари, санъаткорлар ва спортчиларнинг бадиий чиқишлари, аскиячилар баҳси, миллий ўйинлар ва бошқа ранг-баранг томошалар нафақат Наманган аҳли, балки, бу ерга ташриф буюрган барча меҳмонларнинг кўнглига олам-олам завқ олиб кириши табиий.

Маълумотларга қараганда, 60-Гуллар фестивали томошаларидан ҳаммаси бўлиб ярим миллионга яқин киши баҳраманд бўлиши кутилмоқда.

Қудратилла НАЖМИДДИНОВ,
 «Халқ сўзи».