Бўзатов туманида шеърият фестивали бўлиб ўтди. Президентимизнинг ўтган йили октябрь ойида Қорақалпоғистонга қилган ташрифи доирасида белгиланган вазифалар ижросини таъминлаш мақсадида ўтказилган фестивалда мамлакатимизнинг таниқли адиблари, адабиёт ихлосмандлари, ижодкор ёшлар иштирок этди.

Тадбир туман марказидаги Бердақ боғида шоир ҳайкали пойига гул қўйиш маросими билан бошланди.

Шундан сўнг Ёшлар марказида шеърият фестивалининг тантанали очилиш маросими бўлиб ўтди. Унда сўз олганлар юртимизда маданиятимиз ва адабиётимизни ривожлантириш, шу орқали ёш авлодни она Ватанига садоқат, миллий қадриятларимизга ҳурмат руҳида тарбиялашга қаратилаётган эътибор хусусида алоҳида тўхталиб ўтишди.

— Айни кунларда мамлакатимиз бўйлаб «Китобхонлик ҳафталиги» ўтказилмоқда, — дейди Қорақалпоғистон Республикаси Ахборот ва оммавий коммуникациялар бошқармаси бошлиғи Азамат Бекмуратов. — Ўзбекистон Республикаси Вазирлар Маҳкамасининг 2020 йил 14 декабрдаги «2020 — 2025 йилларда китобхонлик маданиятини ривожлантириш ва қўллаб-қувватлаш миллий дастурини тасдиқлаш тўғрисида»ги қарорига асосан 2021 йилдан бошлаб ҳар йили апрель ойининг биринчи ҳафтаси мамлакатимизда «Китобхонлик ҳафталиги» этиб белгилан эди. Бугунги Бўзатов туманида ўтказилаётган шеърият фестивали мана шу ҳафталик доирасида ташкил этилгани билан ҳам муҳим аҳамият касб этади. Ҳозирги кунда Қорақалпоғистондаги бошқа туманларида ҳам китобхонлик ҳафталиги доирасида тадбирлар ташкил қилинмоқда.

Ёшлар марказидаги мушоира кечаси ҳам ўтказилди. Унда таниқли адиблар билан бир қаторда туманнинг ижодкор ёшлари – Зулфия номидаги Давлат мукофоти совриндори Г.Оразбаева, халқаро танлов ғолиби М.Қалбоева, шунингдек, Г.Сарибоева ва Қ.Қалмуратов ва бир қатор ёшларлар ўз шерларидан намуналар ўқидилар. Ёш ижодкорларга китоблар совға қилинди.

Фестиваль иштирокчилари тумандаги янгидан фойдаланишга топширилган ишлаб чиқариш корхоналари, ижтимоий соҳа объектлари фаолияти билан ҳам танишдилар.

Тадбир туман марказидаги амфитеатрда санъат усталарининг гала концерт дастури билан якунланди.

Ғ.Отажонов,
«Халқ сўзи»