Фото: Иллустратив

Ҳудудий прокуратураларда Камбағалликни қисқартириш ва аҳолини ижтимоий ҳимоя қилиш соҳасида қонунчилик устидан назорат бўлинмалари ташкил этилади. Бу ҳақда Шавкат Мирзиёевнинг «Камбағалликни қисқартириш ва аҳолини ижтимоий ҳимоя қилиш соҳасидаги қонунчиликка риоя этилиши ва унинг ижроси устидан назоратни кучайтириш чора-тадбирлари тўғрисида»ги Фармонида кўрсатиб ўтилди.

Маълум бўлишича, фармонга билан Камбағалликни қисқартириш ва аҳолини ижтимоий ҳимоя қилиш соҳасидаги қонунчиликка риоя этилиши ва унинг ижроси устидан назоратга масъул бўлган Бош прокурор ўринбосари лавозими киритилади.

Бунда Бош прокуратуранинг ташкилий-штат тузилмасида 7 та штат бирлигидан иборат Камбағалликни қисқартириш ва аҳолини ижтимоий ҳимоя қилиш соҳасида қонунчилик устидан назорат бошқармаси ташкил этилиши кўзда тутилган.

Қайд этилишича, Қорақалпоғистон Республикаси, вилоятлар ва Тошкент шаҳар прокуратураларида жами 28 та штат бирлигидан иборат Камбағалликни қисқартириш ва аҳолини ижтимоий ҳимоя қилиш соҳасида қонунчилик устидан назорат бўлинмалари ташкил этилиши ҳам фармон ижроси билан боғланган.

Янги киритилаётган Бош прокурор ўринбосари зиммасига бир қатор муҳим вазифалар юклатилади. Масалан, ушбу лавозим эгаси ҳар ҳафтада камида битта туман (шаҳар)га бориб, камбағал оилаларни реестрга киритиш ва чиқаришнинг ҳаққонийлигини ўрганади.

Шунингдек, камбағал оилаларга берилаётган маблағлар эгасига манзилли етиб боришини назорат қилиш, камбағалликни қисқартириш ва аҳолини ижтимоий ҳимоя қилиш соҳасида зиммасига юклатилган вазифаларни лозим даражада бажармаган масъулларга нисбатан қонун устуворлиги ва жазо муқаррарлигини таъминлаш ҳам Бош прокурор ўринбосари зиммасига юклатилади.

Ижтимоий ҳимоя ва камбағалликни қисқартириш соҳасида қабул қилинаётган қонунлар талаблари, Президентнинг Фармон ва қарорларида белгиланган топшириқлар ижросини назорат қилиш ҳам фармон билан Бош Прокурорнинг янги ўринбосари масъулиятига киради.

Аввалроқ, Шахмат Олимпиадасидаги бугунги рақибимиз Миср эканлиги ҳақида хабар берилганди.