Фото: Goal.com

«Реал Мадрид» Килиан Мбаппенинг «Сантьяго Бернабеу»даги тақдимотидан сўнг, бир ҳафта ичида рекорд даражада франциялик футболчининг футболкаларини сотишга эришди. Бу ҳақда «Goal» нашри хабар берди.

Маълум бўлишича, француз юлдузи футболкалар савдоси бўйича Жуд Беллингемдан ўзиб кетди. Мбаппенинг 9-рақамли либоси мухлислар томонидан энг кўп сотиб олинган футболкага айланиши билан бирга бир йил давомида инглиз футболчисининг жами сотилган футболкаларидан 5 баробар кўплиги маълум бўлди.

«Реал Мадрид» сафида ажойиб дебют мавсумини ўтказган Беллингем жамоанинг энг машҳур футболчиларидан бири ҳисобланади. «Ярим ҳимоячи жамоанинг ўтган мавсумдаги энг яхши тўпурари бўлди, шунга қарамасдан унинг 5-рақамли футболкаси Мбаппеникидан кам сотилгани ҳайратланарли», деб ёзди «Goal».

Қайд этиш керакки, Мбаппе «Реал Мадрид» билан мавсумолди ўйинларида қатнашмайди. Тақдимотдан сўнг у қисқа муддатли таътилга чиққан ва қайтгач махсус дастурда шуғулланишни бошлайди. Расмий дебютини 14 август куни УЕФА Суперкубогида «Аталанта»га қарши ўтказиши кутилмоқда.

«Реал Мадрид» келаси мавсумга АҚШда тайёргарлик кўрмоқда. Жамоа 31 июль куни «Милан»га, 3 август куни «Барселона»га, 6 август куни эса «Челси»га қарши баҳс олиб боради.

Мбаппенинг «Реал Мадрид»га ўтиши клуб тарихидаги энг кутилган воқеалардан биридир. Мухлислар уни Винисиус, Родриго ва Беллингем каби юлдузлар билан бирга ўйнашини кўришни хоҳлашади. У янги мавсумда жамоага сезиларли муваффақият келтириши кутиляпти.

Аввалроқ «EA Sports FC 25» муқовасидан қайси футболчи жой олиши маълум бўлганди.