Андижон вилоятида аҳолини сифатли гўшт маҳсулоти билан таъминлаш мақсадида олиб борилаётган ишлар доирасида балиқчиликни ривожлантиришга алоҳида эътибор қаратилмоқда. Жумладан, Улуғнор туманида шу йилнинг ўзида тадбиркорлар томонидан 42 та балиқчилик ҳовузлари ташкил этилган бўлиб, ҳар бир ҳовузлар 1-1.2 гектарни ташкил этади. Шу кунгача уларга 2.5 тонна балиқ чавоқлари ташланди. Шунингдек, ҳавзага 40 та сув тозалаш ускунаси ўрнатилиши кўзда тутилган бўлиб, ҳозирда Хитой давлатидан 3 та ускуна етиб келди ва ҳовузларга ўрнатилди.

— Жаҳон соғлиқни сақлаш ташкилотининг маълумотида баён этилишича, ҳар бир фуқаро йил давомида камида 7 кг.дан кам бўлмаган миқдорда балиқ гўшти истеъмол қилиши мақсадга мувофиқдир,-дейди тадбиркор Неъматжон Аҳмадалиев. — Андижон вилояти аҳолиси айни пайтда 3,5 миллион нафардан ортиқ эканлигини инобатга олсак, балиқчилик истиқболли лойиҳалардан бири ҳисобланади.

Ўтган йили вилоятда 12 минг тонна балиқ етиштирилган бўлса, жорий йилда бу кўрсаткич 15 минг тоннани ташкил этиши режалаштирилган. Шундай бўлишига қарамай, аҳоли эҳтиёжи ва яратилаётган имкониятларни инобатга олиб, қўшимча яна 10 тонна маҳсулот етиштириш устида иш олиб борилмоқда. Бу билан аҳолини сифатли ва хавфсиз озиқ-овқат маҳсулоти билан таъминлашга эришилади.

Саминжон ҲУСАНОВ,
«Халқ сўзи»