Ўзбекистонлик таниқли боксчи Баҳодир Жалолов 5 апрель куни Қозоғистоннинг Остана шаҳрида бўлиб ўтадиган йирик бокс оқшомида рингга чиқиши кутилмоқда. Мазкур турнирни жаҳонга машҳур «Top Rank» промоутерлик компанияси ташкил этмоқда. Жалолов ушбу компания билан шартномага эга бўлгани учун бу хабар ҳақиқатга яқин.

Қайд этиш керакки, Жалолов 7 февраль куни Канадада франциялик Девид Спилмонтга қарши жанг ўтказиши керак эди. Аммо ташкилотчилар боксчининг юзида пайдо бўлган ҳуснбузар сабабли унинг жангини бекор қилишганди. Шундан сўнг, Жалолов ва Спилмонт тез орада янги жанг ўтказишга тайёр эканликларини маълум қилишган. Баҳодирнинг жамоаси француз боксчисини Тошкентда рингга чиқишга таклиф қилган эди, аммо музокаралар қандай якун топгани ҳозирча номаълум.

Ҳозирча Жалоловнинг Останадаги рақиби ким бўлиши ҳақида расмий маълумот йўқ. Аммо «Барыс Арена»да ўтказиладиган ушбу турнирнинг марказий жанги Жанибек Алимханули ва Анауэль Нгамиссенге ўртасида бўлиши маълум. Қозоғистонлик Алимханули IBF ва WBO версиялари бўйича ўрта вазнда жаҳон чемпиони ҳисобланади. Унинг рақиби – келиб чиқиши конголик, ҳозирда Франция шарафини ҳимоя қилаётган профессионал боксчи.

Шунингдек, Остана шаҳридаги турнирда қозоғистонлик ака-ука Маҳмуд ва Торехан Сабирхонлар профессионал боксдаги дебют жангларини ўтказишади. Ушбу мусобақа Қозоғистон боксининг йирик воқеаларидан бири бўлиши кутилмоқда. Жалоловнинг иштирок этиши эса мазкур бокс кечасига янада қизиқиш уйғотади.