АҚШ президенти Дональд Трамп Хитой импортига янги 100 фоизлик божлар жорий этиш таҳдидини давом эттирадиган бўлса, Пекин Вашингтонга қарши жавоб чораларини кўришга ваъда берди.

Трампнинг сўнгги таҳдиди Хитой ўтган ҳафта ноёб минералларга экспорт чекловларини киритганидан кейин пайдо бўлди. Бу жараён савдо музокараларида эришилган натижаларни йўққа чиқариши мумкин.

«Юқори тарифлар билан таҳдид қилиш Хитой билан ҳамкорлик қилишнинг тўғри усули эмас. Агар АҚШ бир томонлама ҳаракат қилишда давом этса, Хитой ўзининг ҳуқуқ ва манфаатларини ҳимоя қилиш учун қатъий равишда тегишли чораларни кўради. Тарифлар урушини биз хоҳламаймиз, бироқ бундан қўрқмаймиз ҳам», — деди Савдо вазирлиги вакили.

Баҳорда Хитой ва Америка импортига йиғимлар мос равишда 145 фоиз ва 120 фоизга кўтарилган эди. Охирги янгиликлар сармоядорлар ва саноат корхоналарида яна ташвиш уйғотмоқда.

Трамп ва Хитой етакчиси Си Цзиньпин икки ҳафтадан сўнг Жанубий Кореяда учрашув ўтказиши кутилаётган эди, бироқ Трамп ноёб минераллар муаммосига ишора қилиб, бу учрашув бўлишига шубҳа билан қарамоқда.

Пекин томонидан эълон қилинган ноёб минералларга чекловлар чет элда ишлаб чиқариш, жумладан ҳарбий ва яримўтказгичлардан фойдаланишга қарши қаратилган.

Бу кундалик электроника, яримўтказгичлар ва автомобиллардан тортиб қирувчи самолётларгача бўлган ҳамма жиҳозни ишлаб чиқариш учун ушбу минералларга таянадиган глобал саноат ва технологик таъминот занжирларига сезиларли босим ўтказиши кутилмоқда.

Пекин узоқ вақтдан бери Вашингтонни экспорт қоидаларини бузганликда айблаб келади. Бошқа давлатларда АҚШ технологиясида ишлаб чиқарилган маҳсулотларни Хитойга етказиб беришда тўсқинлик қилаётгани учун ҳам танқид қилади.