Федерал судья Жон Кофенур Дональд Трамп маъмуриятининг Қўшма Штатларда туғилган болаларга автоматик фуқаролик беришни тўхтатиш тўғрисидаги фармойишини вақтинча чеклаб қўйди. Бу ҳақда «Reuters» агентлиги хабар берган.

Трамп мазкур фармонни президентлик лавозимига қайтган биринчи кунида имзолаган эди. Фармонга кўра, агар чақалоқнинг ота-онаси АҚШ фуқароси ёки қонуний резиденти бўлмаса у фуқаролик мақомидан маҳрум этилади.

Суд жараёнида судья Кофенур бу фармойишни Конституциянинг 14-ўзгартиришига зид деб топди ва 14 кун давомида амалга оширилишини блоклади. Мазкур ўзгартириш Қўшма Штатлар ҳудудида туғилган ҳар бир кишининг автоматик фуқароликка эга бўлишини кафолатлайди. Бу тартиб бекор қилинса, ҳар йили 150 мингдан ортиқ янги туғилган чақалоқ Америка паспортидан маҳрум бўлиши мумкин.

Судда Трамп сиёсатига қарши чиқаётган Вашингтон штати бош прокурори Ник Браун, «Агар сиз Америка заминида туғилган бўлсангиз, сиз Америка фуқаросисиз. Президент бу ҳақиқатни ўзгартира олмайди,» дея таъкидлади.

Фармон АҚШ Адлия департаменти томонидан ҳимоя қилинмоқда. Департамент ушбу чеклов устидан апелляция киритишини билдирган. Бу янги президентнинг иммиграция сиёсати бўйича биринчи катта ҳуқуқий тўсиқ бўлди ва масала энди узоқ муддатли суд муҳокамасига олиб чиқилиши кутилмоқда.