Фото: Reuters

АҚШ сайловларига 11 кун қолганда Дональд Трамп Аризона ва Невада штатларида юқори натижага эришди, Камала Ҳаррис эса Жоржияга эътибор қаратди. Ҳаррис ушбу штатда Американинг ўрта синф вакилларига мурожаат қилиб, 20 минг одамни тўплашга эришди. Уни қўллаб-қувватловчилар орасида таниқли мусиқачи Брюс Спрингстин, собиқ президент Барак Обама, кинорежиссёр Спайк Ли ва актёр, кинорежиссёр Тайлер Перри ҳам бор эди.

Флорида университетидаги сайлов лабораториясининг кузатув маълумотларига кўра, пайшанба оқшомида 30 миллиондан ортиқ сайловчи аллақачон овоз бериб бўлган. Бу баъзи штатларда эрта овоз бериш рекордини янгилаган бўлса-да, ҳозиргача бу рақамлар 2020 йилдагидан анча паст ҳисобланади. Ўша пайтда COVID-19 пандемияси даврида сайлов кунидан олдин 100 миллиондан ортиқ сайловчи овоз бериб бўлган эди.

Пайшанба куни “Financial Times” томонидан эълон қилинган янги сўров шуни кўрсатдики, Трамп Ҳаррисдан бироз ўзиб кетган. “Financial Times” ва Мичиган университетининг “Ross” бизнес мактаби томонидан ўтказилган сўров натижаларига кўра, респондентларнинг 44 фоизи Трампнинг иқтисодий бошқарув қобилиятига ишонган бўлса, Ҳаррисда эса бу кўрсаткич 43 фоизни ташкил этди.

Сайловнинг якуний натижасини белгилаб бериши мумкин бўлган еттита муҳим штат Пенсильвания, Шимолий Каролина, Жоржия, Мичиган, Аризона, Висконсин ва Невада. Биргаликда бу штатлар сайловчилар коллегиясининг 93 овозига эга.

“FiveThirtyEight” кундалик сўровига кўра, Ҳарриснинг Мичигандаги қўллаб-қувватлаши 0,7 фоизгача ўсди. Висконсин штатида вице-президент бироз олдинда. Шу билан бирга Трамп Пенсильванияда Ҳаррисдан бироз устунликка эга ва Шимолий Каролина, Аризона ҳамда Жоржия штатларида каттароқ фарқ билан етакчилик қилмоқда. Невадада ҳали курашлар давом этади.

Пайшанба куни Трамп Невада штати Лас-Вегас ва Аризона штатининг Темпе шаҳарларида йиғилиш ўтказди. Аризонадаги учрашувда у тарихдаги энг йирик депортация операциясини бошлашга ваъда берди.

Ўз нутқи давомида у Ҳаррисни масхара қилди ва озчилик жамоаларига мурожаат қилишга ҳаракат қилди. Трамп маъмурияти барча америкаликларни, шу жумладан афро-америкаликларни, испан-америкаликларни, шунингдек, Осиё-Америка ва Тинч океани ороллари аъзоларига маъқул келадиган иқтисодиётни яратишга ваъда берган. Лас-Вегасдаги учрашувда одамлар яшаш нархи, иш жойлари йўқлиги ва инфляция ҳақида ташвиш билдирган.

Ҳаррис жума куни тушдан кейин Техаснинг Хьюстон шаҳрида сайловолди тадбирини ўтказмоқда. Демократик партия веб-сайтида айтилишича, учрашувда мусиқа афсонаси Вилли Нелсон иштирок этади. Бир қанча манбалар Беёнсе ҳам иштирок этиши кутилмоқда. Унинг қаторида машҳур юлдузлар Тейлор Свифт, Эминем ҳам қўллаб-қувватламоқда. Беёнсенинг “Озодлик” қўшиғи Ҳаррис кампаниясининг норасмий мадҳиясига айланди. Ҳаррис Хьюстонда Техасдаги аборт бўйича чекловларга эътибор қаратмоқчи.

Трамп, шунингдек, Ҳаррисдан бироз орқада қолаётган асосий штат бўлган Мичиганда митинг ўтказиши кутилмоқда. Трамп 2016 йилда Мичиган штатида ғалаба қозонган, аммо 2020 йилги сайловларда уни бой берган эди.