Кеча, 31 август куни тунда, соат 23:47 да Афғонистоннинг Ҳиндикуш тоғлигида 6,2 магнитудали кучли зилзила содир бўлди. Бу ҳақда маҳаллий нашрлардан бири — «Tolonews» хабар берди.

Кунар вилоятида юз берган кучли ер қимирлаши оқибатида тахминан 250 киши ҳалок бўлди, яна 500 нафарга яқини жароҳат олган. Табиий офатдан энг кўп жабр кўрган ҳудудлар қаторидан Нургал, Савкай, Ватапур, Маногай ва Чапа Дара туманлари қайд этилмоқда. Бир нечта қишлоқлар кўчки остида қолгани, ҳали ҳам юзлаб одамлар қутқарувчилар томонидан қидирилаётгани айтилмоқда.

Расмий маълумотларга кўра, қутқарув ишлари ҳозирда ҳам давом этмоқда. Афғонистон Мудофаа, Ички ишлар ҳамда Соғлиқни сақлаш вазирликларига қарашли гуруҳлар ҳудудга етказилган. Жароҳатланганлар эса ҳаво транспорти орқали Нангарҳор минтақавий шифохонасига олиб кетилмоқда.

«Толибон» ҳукуматининг матбуот котиби Забиҳуллоҳ Мужоҳид маҳаллий расмийларга мавжуд барча имкониятларни ишга солиб, аҳолини қутқариш ишларини тезлаштириш топшириғи берилганини маълум қилди.

АҚШ Геология хизмати (USGS) маълумотларига кўра, зилзиланинг эпицентри Жалолобод шаҳри яқинида қайд этилган. Дастлабки силкиниш 6,0 баллга тенг бўлган, шундан сўнг 5,2 ва 4,7 баллик иккита кучсизроқ афтершок кузатилган.

Зилзила нафақат Кунарда, балки Нангарҳор ва Лагмон вилоятларида ҳам талафотларга сабаб бўлган. Шунингдек, силкинишлар пойтахт Кобулда ва Покистоннинг Хайбар-Пахтунхва ҳудудида ҳам сезилган.