Испаниянинг Севиля шаҳрида жойлашган «Centro Deportivo San Pablo» спорт мажмуасида 27 февраль куни профессионал бокс оқшоми бўлиб ўтди. Турнирда турли вазн тоифаларида кучли боксчилар иштирок этишди.

Мазкур мусобақада Ўзбекистон шарафини ҳимоя қилаётган Абдумалик Ҳалоков ҳам рингга кўтарилди. Ярим енгил вазн тоифасида жанг қилган ҳамюртимиз венесуэлалик Марлемброн Акуняга қарши баҳс олиб борди.

Жанг 6 раундга мўлжалланган бўлсада, Ҳалоков ўзининг устунлигидан фойдаланиб, баҳсни учинчи раундда техник нокаут билан якунлади.

Жангнинг дастлабки дақиқаларидан бошлаб Абдумалик рақибига жиддий босим ўтказди, унинг зарбалари аниқ ва самарали бўлди. Рақиб эса бир неча бор мувозанатини йўқотиб, муддатидан аввал таслим бўлишга мажбур бўлди.

Бу ғалаба 24 ёшли Абдумалик Ҳалоковнинг профессионал боксдаги иккинчи жанги бўлди ва у яна бир бор ўз имкониятларини кўрсатиб қўйди. Унинг илк профессионал жанги 2023 йилнинг 17 ноябрида Ўзбекистон пойтахти Тошкентда ўтган бўлиб, у украиналик Олехандр Эгоровни иккинчи раундда нокаутга учратган эди. Шу тариқа, Ҳалоков профессионал боксдаги фаолиятини икки жанг – икки ғалаба билан давом эттирмоқда.

Марлемброн Акуня эса профессионал боксда 26 та жанг ўтказган тажрибали боксчи саналади. У олдинги жангларида 13 ғалаба, 12 мағлубият ва 1 дуранг қайд этган. Шунга қарамасдан, Ҳалоковга қарши кечган баҳсда унинг тажрибаси етарли бўлмади ва у техник нокаут билан мағлубиятга учради.

Абдумалик Ҳалоковнинг ушбу натижаси унинг катта рингга жиддий тайёрланаётганини ва келажакда йирик чемпионлик жангларига йўл очиши мумкинлигини англатади. У ҳозирча профессионал фаолиятини ишончли тарзда бошлаган бўлсада, олдинда уни янада муҳим жанглар кутмоқда.