Ispaniyaning Sevilya shahrida joylashgan “Centro Deportivo San Pablo” sport majmuasida 27-fevral kuni professional boks oqshomi boʻlib oʻtdi. Turnirda turli vazn toifalarida kuchli bokschilar ishtirok etishdi.

Mazkur musobaqada Oʻzbekiston sharafini himoya qilayotgan Abdumalik Halokov ham ringga koʻtarildi. Yarim yengil vazn toifasida jang qilgan hamyurtimiz venesuelalik Marlembron Akunyaga qarshi bahs olib bordi.

Jang 6 raundga moʻljallangan boʻlsada, Halokov oʻzining ustunligidan foydalanib, bahsni uchinchi raundda texnik nokaut bilan yakunladi.

Jangning dastlabki daqiqalaridan boshlab Abdumalik raqibiga jiddiy bosim oʻtkazdi, uning zarbalari aniq va samarali boʻldi. Raqib esa bir necha bor muvozanatini yoʻqotib, muddatidan avval taslim boʻlishga majbur boʻldi.

Bu gʻalaba 24 yoshli Abdumalik Halokovning professional boksdagi ikkinchi jangi boʻldi va u yana bir bor oʻz imkoniyatlarini koʻrsatib qoʻydi. Uning ilk professional jangi 2023-yilning 17-noyabrida Oʻzbekiston poytaxti Toshkentda oʻtgan boʻlib, u ukrainalik Olexandr Egorovni ikkinchi raundda nokautga uchratgan edi. Shu tariqa, Halokov professional boksdagi faoliyatini ikki jang – ikki gʻalaba bilan davom ettirmoqda.

Marlembron Akunya esa professional boksda 26 ta jang oʻtkazgan tajribali bokschi sanaladi. U oldingi janglarida 13 gʻalaba, 12 magʻlubiyat va 1 durang qayd etgan. Shunga qaramasdan, Halokovga qarshi kechgan bahsda uning tajribasi yetarli boʻlmadi va u texnik nokaut bilan magʻlubiyatga uchradi.

Abdumalik Halokovning ushbu natijasi uning katta ringga jiddiy tayyorlanayotganini va kelajakda yirik chempionlik janglariga yoʻl ochishi mumkinligini anglatadi. U hozircha professional faoliyatini ishonchli tarzda boshlagan boʻlsada, oldinda uni yanada muhim janglar kutmoqda.