Украина президенти Владимир Зеленский тинчлик режасини референдумга қўймоқчи. Бу ҳақида BILD нашри маълум қилди.

Унда айтилишича, Владимир Зеленский WhatsApp тармоғидаги саҳифаси орқали журналистлар билан суҳбат уюштирган. У мазкур суҳбат давомида 20 банддан иборат тинчлик режасини аввал Украина, АҚШ, Россия ва Европа томонидан келишиб олиниши ҳамда имзоланиши кераклигини, кейин эса референдумга қўйилишини маълум қилган.

Зеленскийнинг таъкидлашича, тинчлик режаси бўйича референдум ўтказиш учун камида 60 кунлик сулҳ ҳам зарур бўлади.

Украина раҳбари Россия билан тинчлик режаси бўйича тўғридан-тўғри музокараларга тайёр, бироқ фақат АҚШ президенти Дональд Трамп ва Европа давлат ва ҳукумат раҳбарлари ушбу режани маъқуллаганларидан кейингина музокара ўтказиши мумкин.

Билдирилишича, Зеленский Қўшма Штатлар раҳбаридан мазкур тинчлик келишувига эришилган тақдирда 50 йиллик хавфсизлик кафолатлари сўраган. Зеленский журналистлар билан суҳбати чоғида айни пайтдаги тинчлик шартномаси лойиҳаси Украина учун 15 йилгача хавфсизлик кафолатларини беришини ҳам қўшимча қилган.