Одатда, иш юзасидан турли тақдир эгалари билан учрашамиз. Бу ҳар кунги ҳолат бўлгани боис уларнинг аксарияти ажабланарли эмас. Бироқ бугунги воқеа мени ўйлашга мажбур қилди.

— Турмуш ўртоғим билан 15 йил бирга яшадик, — дейди аёл суҳбат чоғида. — Бу орада уч нафар фарзандли бўлдик. Биргаликда савдо соҳасида фаолият юритдик. Ўзимдан, рўзғордан орттириб, кредит асосида автомобиль ҳам сотиб олдим. Тақдир эмас экан, ўтган йили ажралишимизга тўғри келди. Ишсиз қолганим етмаганидек, собиқ эрим машинамни бермай қўйди. Мен-ку, шунга ҳам рози эдим, лекин тадбиркорлик фаолиятимга доир солиқ ва бошқа қарздорликлар ҳақида хабар келгач, бошим қотиб қолди. Сабаби, бугунги кунда даромад манбаим йўқ, қарзларни эса тўлашим керак. Шу боис Мажбурий ижро бюроси (МИБ)га келиб, турмуш ўртоғимда қолиб кетган менинг номимдаги автомобилни топиб беришларида ёрдам сўрадим.

Қаршимда ўтирган аёлнинг сўзларига қулоқ солар эканман, хаёлимда жавобсиз саволлар пайдо бўла бошлади. Наҳотки, инсон боласи меҳнат қилса топиладиган мол-мулкни деб 15 йиллик турмушига, аёлининг қадр-қимматига, уч нафар фарзандининг юзига оёқ қўйиши мумкин бўлса?! 15 йил ичида, гарчи, бир тан-у бир жон бўлишнинг уддасидан чиқа олмаган бўлсалар-да, бир-бирини қалбан тушуниб, ҳис қилишлари, ўз ғам-ташвишларию қувончларини баҳам кўра олиш даражасига етишлари керак эмасмиди? 15 йиллик турмуш қадри учун мол-мулкни яшириш шарт эмасди. Билмадим, бу ҳолатга қандай баҳо бериш мумкин...

Шундай қилиб, фуқаро Д.Қ.нинг мурожаатига асосан қарздорликлар бўйича қидирувда бўлган “NEXIA 3” русумли автомашина Андижон шаҳар “Тўққиз ариқ” МФЙда яшовчи собиқ турмуш ўртоғи О.Д.нинг хонадонидан топилиб, жарима майдончасига олиб келинди.

Қарздорлик шу тариқа ўз ечимини топиши муқаррар. Бироқ менинг кўз олдимдан 15 йил давомида ишонган суянчи, фарзандларининг отаси томонидан заррача меҳрга ташна аёлнинг нигоҳию ҳаммасига оёқ қўйган отанинг ғазабли қарашлари кетмаяпти... Афсуски, бу ҳолатга тушган биргина шу аёл эмас. Таҳлиллар шуни кўрсатмоқдаки, йилнинг ўтган даври мобайнида МИБ Андижон вилояти шаҳар ва туманлардаги бўлимлари орқали қарздорликларга оид жами 6,8 трлн. сўмлик 608 мингта ҳужжатлар ижрога йўналтирилган бўлиб, натижада 4,3 трлн. сўмлик 318 мингда зиёд ҳужжатларнинг ижроси таъминланди. Ҳар бир ҳужжат ортида турли кечмишларга юз тутган тақдир эгалари мавжуд.

Азизлар, инсон бахтли яшаши учун бир чимдим меҳр, бир ҳовуч қадр бўлса кифоя... Илтимос, бир-биримиздан муҳаббатимизни аямайлик.

Ойистахон АБДУРАҲМОНОВА,

МИБ Андижон вилоят бошқармаси катта инспектори.