Фото: AP

АҚШ президенти Дональд Трамп 2024 йил ёзида ўзига қарши уюштирилган суиқасд унинг ҳаётга бўлган қарашларига сезиларли таъсир кўрсатганини айтди. Оқ уй раҳбарининг сўзлари журналист Жонатан Карл томонидан “Қасос: Дональд Трамп ва Американи ўзгартирган кампания” китобида келтирилган.

“Мен бу ҳақда ўйлашни ёқтирмайман. Лекин, ҳа, менимча, бу таъсир кўрсатди”, — деган у бу ҳақда сўралганда.

Журналистнинг сўзларига кўра, Трамп билан суҳбат 2024 йил июль ойида АҚШ президентлигига номзодга суиқасд уюштирилганидан икки кун ўтиб бўлиб ўтган.

“Сўнгги икки кун ичида содир бўлган барча нарсаларга қарамай, Трампнинг овози мени уни олдин эшитганларимдан ҳам хотиржамроқ эди”, — дея ёзган Карл.

Аввалроқ, Карл Трамп суиқасддан сўнг дарҳол касалхонада бўлганида тарафдорларидан воқеа оммавий ахборот воситаларида ёритилганми ёки йўқми деб сўраганини хабар қилган эди. Оқ уйнинг алоқа бўйича директор Стивен Чунг Трампга суиқасддан кейинги суратни кўрсатди. Унда сиёсатчи қўлини кўтараётгани акс этган.

2024 йилда Трамп иккита суиқасд уринишидан омон қолганди. Ўша йилнинг 13 июль куни бўлажак президентнинг Пенсилвания штатидаги сайловчилар олдидаги нутқи отишма билан тўхтатилди. Йигирма ёшли Томас Мэттью Крукс хавфсизлик периметри ташқарисидаги бинонинг томидан ўқ узди; битта ўқ Трампнинг қулоғига тегди ва у АҚШ Махфий хизмати агентлари томонидан саҳнадан олиб чиқилди. 15 сентябрь куни сиёсатчининг Флоридадаги гольф клубида у ўйнаётган пайтда отишма содир бўлди. Қуролли шахс Трампдан тахминан 500 метр узоқликдаги буталар орасида бўлган. Махфий хизмат агентлари уни ўққа тутган. Гумонланувчи қуролни ташлаб, машинада қочиб кетади, аммо тез орада қўшни округда қўлга олинади.