Ижтимоий ҳимоя миллий агентлиги томонидан 2025 йил сентябрь ойида 40 минг 611 мингта фуқаро учун 47,9 миллиард сўм бир марталик нафақа тўловлари амалга оширилди. Бу ҳақида агентликнинг Telegram-каналида маълумот берилди.

Унда айтилишича, 28 минг 784 нафар фуқарога 25,6 миллиард сўм — фарзанд туғилганда бериладиган бир марталик (суюнчи) нафақаси ҳамда 11 минг 827 нафар фуқарога 22,3 миллиард сўм — дафн этиш учун нафақа тўланган.

Суюнчи нафақаси бола туғилгандан сўнг 6 ой ичида боланинг отаси ёки онаси шахсини тасдиқловчи ҳужжатлар билан АТ «Халқ банки»нинг исталган филиалига мурожаат қилиб ёки мобил телефондан «Хазна» иловаси орқали бир марталик нафақани олишлари мумкин. Суюнчи нафақаси онанинг фақат биринчи фарзанди учун берилади. Агар оила «Ижтимоий ҳимоя ягона реестр»да рўйхатда турса, ушбу оила иккинчи фарзанди учун ҳам нафақа олиш ҳуқуқига эга.

Шунингдек, дафн этиш нафақаси ФҲДЁ бўлими томонидан ўлим ҳақидаги гербли гувоҳнома берилган шахсга тўланади. Дафн этиш нафақасини АТ «Халқ банки»нинг исталган филиалига мурожаат қилиб ёки мобил телефондан «Хазна» иловаси орқали бир марталик нафақани олиши мумкин.

«Агар мурожаат қилувчи шахснинг ҳуқуқи бўлмаса, суд томонидан муомалага лаёқатсиз деб топилган бўлса ёки фуқаронинг ўлими қайд қилинганидан сўнг 60 кундан кейин мурожаат қилинса, нафақа тўлаш рад этилади», — дейилади хабарда.

Маълумот учун, бугунги кунда суюнчи нафақаси 893 минг 513 сўм, дафн этиш нафақаси эса 1 миллион 884 минг сўмни ташкил этади.