Архив фото

Украина президенти Владимир Зеленский Киев делегациясига Россия билан ҳудудларни муҳокама қилишни тақиқлади. Унинг таъкидлашича, Киев делегацияси Россия билан музокараларда ҳудудларни муҳокама қилиш ваколатига эга эмас.

“Украина делегацияси можарони ҳал қилиш бўйича музокараларда Россия билан меморандум доирасида фақат гуманитар масалаларни муҳокама қилиш ваколатига эга. Чунки уларнинг мандати йўқ. Бу Украина суверенитети ва ҳудудий яхлитлигини муҳокама қилишдир. Ҳудудлар бўйича мулоқот ўтказиш менга ва Путин (Россия президенти Владимир Путин – таҳр.)га боғлиқ... Мен бу масала бўйича ўз позициямни бошқа ҳеч ким билан муҳокама қилмайман” – деди Украина президенти Венгриянинг “Valasz Online” нашрига берган интервьюсида.

Шу ўринда Зеленский Киев йўқотилган ҳудудларни де-юре (лотинча “de jure” сўзидан олинган бўлиб, “қонуний”, “қонун бўйича” маъносида ишлатиладиган ибора – таҳр.) Россия деб тан олмаслигини қўшимча қилди.

Украина етакчиси, шунингдек, Ғарб давлатлари, жумладан, АҚШ Россияга етарлича босим ўтказмаётганини айтди. Унга кўра, нафақат АҚШ, балки бошқа давлатлар ҳам Москвага “Урушни тўхтатинг, акс ҳолда Украинага қурол берамиз”, деб айтиши керак. Чунки Россия дипломатик жараёнга эътибор бермаяпти.

Шу ўринда Украина президенти Ғарб нега Россияга нисбатан қаттиқроқ чекловлар жорий этишдан бош тортаётганини тушунтирди. Унинг сўзларига кўра, бунинг сабаби Киевнинг 18 ва ундан катта ёшдаги фуқароларни сафарбар қилмаганидир.

“Биз 18-24 ёшли ёшларга ҳамкорларимиз хоҳласа, улар ҳам хизмат қилишлари мумкинлигини кўрсатиш имкониятини яратдик”, – дея қўшимча қилди Украина раҳбари ва Киев украиналик ёшларга мамлакат Мудофаа вазирлиги билан бир йиллик шартнома таклиф қилганини таъкидлаб.

“Россиянинг ракета зарбалари... АҚШ ва бошқа дунёдаги Россияни тинчликка мажбурлаш уринишларидан баландроқ. Бугун Киевга қилинган ҳужум энг катта зарбалардан бири бўлди. Одесса, Днепровск ва Чернигов вилоятлари ҳам нишонга олинди”, – дейди Украина президенти.

Россия Давлат думасининг халқаро ишлар бўйича қўмитаси раисининг биринчи ўринбосари Алексей Чепанинг айтишича, бу талаб тинчлик музокараларини боши берк кўчага олиб боради.

Парламент аъзоси, шунингдек, Украина президентининг баёнотини “адекват эмаслик” белгиси, унинг Путин билан учрашишга тайёрлиги ҳақидаги сўзларини эса “PR кампанияси” деб атади.

“Ҳеч қандай музокаралар шунчаки олиб борилмайди, айниқса, юқори даражада – ҳаммаси олдиндан тайёрланади. Бу бемаънилик... Аввал тайёргарлик кўришингиз керак, кейин эса “мен тайёрман” айтинг, – дея хулоса қилди Чепа.

Давлат Думаси депутати Светлана Журова ҳам Россияни тинчликка мажбурламаслик кераклигини таъкидлади. У Украина Россия ҳудудида мунтазам равишда террорчилик ҳаракатларини амалга ошираётганини, Украина расмийлари эса фақат Москвани мажбурлаш зарурлиги ҳақида гапириб, ўз ҳаракатларини оқлашга уринаётганини айтди.