Доналд Трамп қонуний равишда Оқ уйга учинчи муддатга қайтиши мумкин. Бу ҳақида «The Eсonomic Times» нашри маълум қилди.

Унга кўра, Қўшма Штатлар Конституциясининг 22-тузатиши президентларга икки муддатдан ортиқ ушбу лавозимни эгаллашни тақиқлайди. Бироқ, мазкур тузатмада бир бўшлиқ бор, у орқали Трамп учинчи, ҳатто тўртинчи муддатга ҳам президент сифатида қолиши мумкин.

Маълум қилинишича, АҚШ Конституциясининг 22-тузатишдаги бўшлиқ шуни кўрсатадики, президент икки мартадан ортиқ сайлана олмаса ҳам, улар ўз ваколатини ворислик орқали сақлаб қолишлари мумкин бўлади.

«Мазкур ҳолат ҳуқуқшунослар ва амалдаги давлат раҳбари Доналд Трамп тарафдорлари орасида эътиборни жалб этмоқда. Улар бу ғояни аллақачон муҳокама қилишмоқда», — дейилади нашр хабарида.

Мутахассисларнинг таъкидлашича, АҚШ конституциясининг 22-тузатишдаги асосий жумла – «Ҳеч ким икки мартадан ортиқ президентликка сайлана олмайди» – деган қоидага асосланган.

Ушбу жумла шуни англатадики, икки марта сайланган президент бошқа президентнинг истеъфоси ёки вафоти туфайли буткул президент бўлиш ҳуқуқидан маҳрум қилинмаган.

Шу тариқа, Трамп аввал вице-президентликка номзодини қўйса, президентликка эса амалдаги вице-президент Жей Ди Вэнс номзод бўлса, сайловдан сўнг Венс қасамёд қилиб, кейин истеъфога чиқса, Трамп унинг ўрнига президентликни эгаллаши мумкин. Бу стратегия конституциявий икки мартадан ортиқ президентликка сайланиш тақиқини бузмайди.