Donald Tramp qonuniy ravishda Oq uyga uchinchi muddatga qaytishi mumkin. Bu haqida “The Esonomic Times” nashri maʼlum qildi.

Unga koʻra, Qoʻshma Shtatlar Konstitutsiyasining 22-tuzatishi prezidentlarga ikki muddatdan ortiq ushbu lavozimni egallashni taqiqlaydi. Biroq, mazkur tuzatmada bir boʻshliq bor, u orqali Tramp uchinchi, hatto toʻrtinchi muddatga ham prezident sifatida qolishi mumkin.

Maʼlum qilinishicha, AQSH Konstitutsiyasining 22-tuzatishdagi boʻshliq shuni koʻrsatadiki, prezident ikki martadan ortiq saylana olmasa ham, ular oʻz vakolatini vorislik orqali saqlab qolishlari mumkin boʻladi.

“Mazkur holat huquqshunoslar va amaldagi davlat rahbari Donald Tramp tarafdorlari orasida eʼtiborni jalb etmoqda. Ular bu gʻoyani allaqachon muhokama qilishmoqda”, deyiladi nashr xabarida.

Mutaxassislarning taʼkidlashicha, AQSH konstitutsiyasining 22-tuzatishdagi asosiy jumla – “Hech kim ikki martadan ortiq prezidentlikka saylana olmaydi” – degan qoidaga asoslangan.

Ushbu jumla shuni anglatadiki, ikki marta saylangan prezident boshqa prezidentning isteʼfosi yoki vafoti tufayli butkul prezident boʻlish huquqidan mahrum qilinmagan.

Shu tariqa, Tramp avval vitse-prezidentlikka nomzodini qoʻysa, prezidentlikka esa amaldagi vitse-prezident Jey Di Vens nomzod boʻlsa, saylovdan soʻng Vens qasamyod qilib, keyin isteʼfoga chiqsa, Tramp uning oʻrniga prezidentlikni egallashi mumkin. Bu strategiya konstitutsiyaviy ikki martadan ortiq prezidentlikka saylanish taqiqini buzmaydi.