Jahon sogʻliqni saqlash tashkiloti oʻzining “2024-yilgi Sogʻliqni saqlash boʻyicha jahon statistikasi” hisobotining soʻnggi nashrini eʼlon qildi. Unda COVID-19 pandemiyasi inson tugʻilganda kutilayotgan umr davomiyligi va sogʻlom umr koʻrish davomiyligining barqaror oʻsish tendensiyasini oʻzgartirib yuborganligi qayd etilgan.

Atigi ikki yil davomida pandemiya umr koʻrish davomiyligini koʻtarish boʻyicha qariyb oʻn yillik yutuqlarni yoʻqqa chiqardi. 2019 – 2021-yillar davomida butun dunyo boʻylab oʻrtacha umr koʻrish 1,8-yilga qisqardi va 71,4 yoshni tashkil etdi (yaʼni 2012-yilgi natijaga qaytdi). Xuddi shunday, 2021-yilda global sogʻlom umr koʻrish davomiyligi 1,5-yilga qisqarib, 61,9 yoshni tashkil qildi (2012-yil darajasiga qaytdi).

2024-yil hisobotida, shuningdek, pandemiyaning taʼsiri butun dunyo boʻylab notekis sezilayotgani taʼkidlanadi. JSSTning Amerika va Janubi-Sharqiy Osiyo mintaqalari, ayniqsa, koʻp jabr koʻrdi. 2019 – 2021-yillar oraligʻida oʻrtacha umr koʻrish taxminan 3-yilga, sogʻlom umr koʻrish esa 2,5-yilga qisqardi. Bundan farqli oʻlaroq, Gʻarbiy Tinch okeani mintaqasiga pandemiyaning dastlabki ikki yili eng kam taʼsir koʻrsatdi, oʻrtacha umr koʻrish 0,1-yildan kamroqqa, sogʻlom umr koʻrish esa 0,2-yildan kam boʻlgan koʻrsatkichga qisqardi.

COVID-19 tez surʼatda oʻlimning asosiy sababiga aylandi va 2020-yilda dunyoda oʻlimning uchinchi, 2021-yilda esa oʻlimning ikkinchi sababi boʻldi. Bu davr davomida u deyarli 13 million odamni dunyodan olib ketdi. Oxirgi hisob-kitoblarga koʻra, Afrika va Gʻarbiy Tinch okeani mintaqalarini inobatga olmaganda, COVID-19 ushbu ikki yil ichida dunyodagi oʻlimning asosiy beshta sabablaridan biri boʻldi va Amerika mintaqasida oʻlimning yetakchi sababiga aylandi.

Jahon sogʻliqni saqlash tashkiloti hisobotida pandemiyadan oldin oʻlimning asosiy sabablari yurak-qon tomir kasalliklari va insult, saraton, surunkali obstruktiv oʻpka xastaligi, Alsgeymer va boshqa turdagi demensiya, shuningdek, qandli diabet kabi noinfeksion kasalliklar boʻlgani va 2019-yilda ular barcha oʻlimlarning 74 foizini tashkil etgani taʼkidlangan.