Foto: Arxiv surat

22-aprel — Oydin Hojiyeva tavallud topgan kun

Oʻzbekiston xalq shoiri Oydin Hojiyeva 1942-yil 22-aprelda Buxoro (hozirgi Navoiy) viloyatining Qiziltepa tumanidagi Xojayi Boʻston qishlogʻida tugʻilgan.

Shoiraning “Shabnam”, “Manzillar”, “Onam sevgan qoʻshiq”, “Orzu guli”, “Tarovat”, “Dostonlar”, “Mushfiq onajon”, “Xushxabar”, “Chashmalarni izlayman”, “Tamal toshi”, “Ishonch yulduzlari”, “Koʻzimning oqu qorasi”, “Panohim” kabi koʻplab kitoblari oʻquvchilar tomonidan sevib mutolaa qilib kelinmoqda.

Oʻtli tuygʻularni oʻzbek ayoliga xos ajib latofat bilan kuylagan shoiraga mustahkam sihat-salomatlik, omonlik, uzoq umr tilaymiz.

JANNAT OʻZBEKISTONDA…

Bogʻlarda yosuman gullay boshladi,

Qumrilar mastona “hu-hu”lay boshladi,

Oftob yuraklarni yogʻdulay boshladi,

Yozning shamollari xush yoqar jonga.

Qulfinay bargida qizil marjonlar,

Oq tut ogʻizlarda navvot-darmonlar,

Bugʻdoy boshoq tortib sut toʻlar onlar

Yozning xayollari gʻunchalar jonda.

Urushqoq mayna ham xayolparastdir,

Kabutar raqslari ishqqa payvastdir,

Qirqogʻayni gullar bir folparastdir…

Suvlar guldiraydi qoʻsh tegirmonda…

Jannat Oʻzbekistonda…

***

MOʻJIZA LAHZALARI

Umrim boʻgʻotiga qor tushdi necha,

Laylak qorlar yogʻdi afsona aytib.

Hayotimga yangi yil kirgan kecha

Har gal bolaligim uchratdim qaytib.

Kumush teraklarning qir uchlarida

Tilla isirgʻaday qolgan varraklar,

Bir hovuch nur oʻynab kulgichlarida

Oʻsmirligim kelar har yil daraklab.

Allohdan moʻjiza kutgan goʻdakday

Tutsam ona taqdir etaklaridan,

Qor bosgan togʻlardan sayrab kaklikday

Yillarim chiqar qish ertaklaridan.

Koʻzim-la erkalab gʻuncha qizlarni,

Dilbar singillarim manglayin oʻpdim.

Shamolday aylanib dala-tuzlarni,

Gullar yaprogʻiga shudringlar sepdim.

Qorxat olib kelgan kemshik bolakay –

Ostonamda turar shoshqaloq elchi.

Anhor sukutida chalib oqar nay

Vaqt degan gʻanimat gʻaroyib yoʻlchi.

Yogʻoch darchalarning zulfinlarida

Murgʻak qoʻllarimning tafti tovlanar.

Koʻkka oʻrlagan tut ajinlarida

Oʻn toʻrt kunlik oy oʻtovlanar.

Qiziydi gap-gashtak, hangoma, gurung,

Tanchada biqirlab qaynaydi qumgʻon.

Kimdir “Kuntugʻmish”dan oʻqiy boshlar soʻng,

Yerning ildiziga tutashadi jon.

Borliqni chulgʻaydi jannatiy ifor,

Oppoq kamalakdan qamashadi koʻz.

Zamin sukutida guvlaydi bedor

Yurak — kul ichida tirilgan Qaqnus.

Oydin HOJIYEVA,

Oʻzbekiston xalq shoiri.