Ijtimoiy tarmoqlarda Mirzo Ulugʻbek tumanida yuk avtomobili hamda “Onix” ishtirokida YTH sodir boʻlgani toʻgʻrisida xabarlar tarqaldi. Holat yuzasidan Toshkent shahar IIBB YHXB axborot xizmati maʼlumot berdi.

Unda aytilishicha, joriy yilning 8-yanvar kuni soat 05:00 larda Mirzo Ulugʻbek tumani Yangi Oʻzbekiston koʻchasi ikkinchi darajali yoʻlida haydovchi 2004-yilda tugʻilgan fuqaro M.R. “Onix” rusumli avtomashinasini boshqarib ketayotib, rul boshqaruvini yoʻqotgan.

Oqibatda avtomobil yoʻl chetida harakatsiz toʻxtab turgan, 1966-yilda tugʻilgan fuqaro S.R.ga tegishli boʻlgan “GAZ-63” rusumli yuk avtomobili bilan toʻqnashishi oqibatida yoʻl-transport hodisasi sodir boʻlgan.

Ichki ishlar bosh boshqarmasi bergan maʼlumotlarga koʻra, mazkur yoʻl-transport hodisasi oqibatida “Onix” rusumli avtomashina yoʻlovchisi olgan tan jarohatlari natijasida vafot etgan.

Hozirda mazkur holat yuzasidan Toshkent shahar IIBB Tergov boshqarmasi tomonidan Oʻzbekiston Respublikasi Jinoyat Kodeksining 266-moddasi 2-qismi bilan jinoyat ishi qoʻzgʻatilgan. Tergov davom etmoqda.