Livan poytaxti Bayrut shahri mezbonligida oʻtgan dzyudo boʻyicha oʻsmirlar va yoshlar oʻrtasidagi Osiyo-Okeaniya chempionati hamyurtlarimiz uchun kutilganidan ham omadli keldi.

Oʻsmirlarimiz 9 ta oltin, 5 ta kumush, 5 ta bronza medali bilan umumjamoa hisobida birinchi oʻrinni egallashgandi. Yoshlarimiz ham ikki kunlik murosasiz bellashuvlar yakuniga koʻra qitʼada birinchi boʻlishdi. 

Yoshlar terma jamoamiz 7 ta oltin, 2 ta kumush, 6 ta bronza, jami 15 ta medal bilan 15 davlat orasida umumjamoa hisobida faxrli birinchi oʻrinni band etishdi. 

Toʻrt kun davomida Bayrutda 16 marotaba Oʻzbekiston madhiyasi yangradi. Mamlakatimiz dzyudosi tarixida hali bunday natija kuzatilmagandi.

Qozogʻiston terma jamoasi 3 ta oltin, 1 ta kumush, 5 ta bronza medali bilan ikkinchi oʻrinni qoʻlga kiritgan boʻlsa, kuchli uchlikka 2 ta oltin, 5 ta kumush, 4 ta bronza medali bilan Janubiy Koreya terma jamoasi yakun yasadi.