Illyustrativ foto

“Yashil belgi” mahsulot va xizmatlarni yagona ixtiyoriy ekologik markirovkalash tartibi toʻgʻrisida»gi nizom Adliya vazirligida davlat roʻyxatidan oʻtkazildi. Bu haqda vazirlik matbuot xizmati xabar qildi.

Qayd etilishicha, ushbu nizom sertifikatlashtirishni oʻtkazish, talabgorni avtorizatsiyadan oʻtkazish, xorijiy ekologik markirovkalash tizimlarini tan olish va ekologik markirovka belgisini qoʻllashni oʻz ichiga oladi.

Ariza beruvchi ekologik markirovkalash organiga belgilangan shakllardagi mahsulot va xizmatlarni sertifikatlashtirish boʻyicha ariza bilan yozma yoki elektron shaklda murojaat qiladi va ariza 5 ish kuni mobaynida koʻrib chiqiladi.

Maʼlumotlarga koʻra, sertifikatlashtirishni oʻtkazish 3 oydan oshmagan muddatda amalga oshiriladi. Shuningdek, ekspertlar guruhi tomonidan sertifikatlashtirish jarayoni natijalari boʻyicha xulosa rasmiylashtiriladi.

Taʼkidlash joiz, sertifikatlashtirish natijalaridan norozi boʻlganlar 1 oy ichida Apellyatsiya komissiyasiga yozma yoki elektron shaklda apellyatsiya shikoyati berishi mumkin.