Qoraqalpogʻiston Respublikasining Beruniy tumanida qishloq xoʻjaligi sohasida yer bilan tillashib, mahalladoshlari oilasiga baraka kiritayotgan mehnatkash ayollar koʻp. Tumandagi “Raʼno Kamalovna” fermer xoʻjaligi rahbari Raʼno Yuldasheva ana shunday mirishkorlardan. Fermer xoʻjaligi aʼzolari jami 15 gektarga yaqin maydonda dehqonchilik qiladi. Shundan 5 gektarida uzumning bir nechta navi yetishtiriladi. Yozda uzumning mahalliy ertapishar navlaridan charos, husayni yetishtirilsa, kuzda toyfi pishib yetiladi.

– Orolboʻyi sharoitiga mos uzum navlarining yaxshi tomoni uzilgandan keyin ham taʼmi oʻzi bilan saqlanadi. Shundan xaridori koʻp, – deydi Raʼno Yuldasheva. – Kuzda ob-havo salqinlashganida toyfi uzumining mazasiga yanada shira kiradi. Uzumchilik serdaromad yoʻnalish, mashaqqati ham shunga yarasha. Qoraqalpogʻistonda qish sovuq kelgani bois kuzda tuproq ostiga koʻmish, bahorda qayta ochish ishlari katta mehnatni talab qiladi. Toklarni payvandlash, agrotexnik tadbirlar paytida tajribam yetmagan paytlari ham boʻlgan. Chunki xoʻjalikni turmush oʻrtogʻim boshqarardi. Kutilmagan xastalik tufayli dunyodan oʻtganda, u kishining kechani kecha, kunduzni kunduz demay qilgan mehnatlarini koʻz oldimga keltirib: “... Nahot, bogʻni saqlab qolish qoʻlimdan kelmaydi?” – deya harakatga tushdim. Oila aʼzolarim ham yonimda turishdi. Ayni paytda tokzorimizning 3 gektari mevaga kirgan. Ikki gektariga subsidiya asosida 33 million soʻm kredit evaziga Fargʻonadan keltirilgan yangi navlardan ekib parvarishlayapmiz. Harakatda – barakat. Yiliga 10 tonna uzumni bozorga chiqaryapmiz. Mehnatimiz ortidan kelin olib, qiz uzatdim. Uy taʼmiridan tortib, mashina xaridigacha rizqimiz moʻjazgina shu bogʻimiz ortidan. Tong otdi deguncha tokzorlarni oralayman, mevalarni koʻrib bahri dilim ochiladi. Davlatimiz tomonidan tadbirkorlarga, fermerlarga yaratib berilayotgan sharoit va imkoniyatlardan foydalanib bogʻimizni kengaytirmoqdamiz. Kelgusi yil olma, nok va yangi uzum navlari ham hosilga kiradi. Maqsadim bozorlarimizni arzon, sarxil meva-sabzavot mahsulotlari bilan taʼminlash va eksportga chiqarishdir.

Mazkur fermer xoʻjaligi hosilning asosiy qismini Qozogʻistonga eksport qilmoqda. Dastlabki eksportga chiqarilgan 4 tonna uzum manzilga yetib bordi. Oʻn ikki nafar mavsumiy ishchilar hosilni terib, qadoqlashda yordam bermoqda. Qoʻshni davlatlarda ham Qoraqalpogʻistonda yetishtirilgan mevalar xaridorgir. Oʻz vaqtida agrotexnik tadbirlarni amalga oshirish, qilingan mehnat uzumning yaxshi hosil berishiga sabab boʻladi.

Raʼno opaning shijoatidan ilhomlangan Munavvar Roʻziyeva ham koʻp yillardan beri gulchilik bilan shugʻullanadi.

– Shu xonadonga kelin boʻlib tushganimga 15-yil boʻldi, – deydi Munavvar opa. – Avvaldan bu xonadon koʻchatchilik, gulchilik bilan shugʻullangan. Boshida gulchilikni, issiqxona ishlarini bilmasdim. Qaynonam boshchiligida uch nafar ovsinimning kun boʻyi hovli etagidagi issiqxonada gul parvarishi bilan shugʻullanishlari, kechqurun dasturxon atrofida bajarilgan ishlarning muhokama qilishlari gulchilikka qiziqish uygʻotdi. Gullar jonli tabib. Ularga qarasang, koʻngling yoziladi. Hech bir kun yoʻqki, xonadonimizga xaridorlar tashrif buyurmagan boʻlsa. Hali u gulni, hali bu gulni soʻrab kelishadi. Asosan, baxt guli, geran, fikus, palma, kaktus singari gullarning bozori chaqqon. Har bir xaridorning tashrifi xonadonimiz uchun baraka. Mavsumda mahallamizda ishsiz oʻtirgan ayollarni ham jalb qilamiz.

Tadbirlining ishi besh, deya bejiz aytilmagan. Ushbu tumanning Shabboz ovul fuqarolar yigʻinidagi Raʼno Yuldasheva boshchiligida yetishtirilayotgan mahsulotlar bugun qoʻshni respublikalarda ham sotilib, yurtimizdagi eksport salohiyatini koʻtarmoqda. Boʻston mahallasidagi Munavvar Roʻziyeva nafaqat tomorqasini, balki mahallasini ham gullar boʻstoniga aylantirmoqda. Bu ishni qoʻshnilariga ham oʻrgatib “Boʻston”ni gulchilar mahallasiga aylantirishga katta hissa qoʻshmoqda.

Gʻ.Otajonov

(“Xalq soʻzi”).