Farhod ESONOV/“Xalq soʻzi”. Termiz tumanidagi “Termiz xalqaro savdo markazi” erkin savdo zonasida hududiy tarmoqlararo sanoat yarmarkasi oʻtkazilmoqda.

Yarmarka Surxondaryo viloyati hokimligi, Investitsiyalar, sanoat va savdo vazirligi, Raqamli transformatsiya markazi, Oʻzbekiston qurilish materiallari sanoat korxonalari uyushmasi hamda “Oʻzkimyosanoat” uyushmasi hamkorligida tashkil etilgan.

Unda mamlakatimizning beshta yirik tarmoq korxonasi hamda viloyatda faoliyat yuritayotgan 200 dan ortiq mahalliy tadbirkorlar qishloq xoʻjaligi, meva-sabzavot mahsulotlarini qayta ishlash, kimyo sanoati, charm-poyabzal va toʻqimachilik, qurilish materiallari, oziq-ovqat sanoati kabi yoʻnalishlarda oʻzlari ishlab chiqarayotgan 500 turdagi sanoat mahsuloti bilan ishtirok etmoqda.

Afgʻonistonlik ishbilarmon doira vakillari yarmarkada namoyish etilayotgan mahsulotlarga katta qiziqish bildirdi. Shuningdek, erkin savdo zonasi hududidagi “Hilton” mehmonxonasi, “AKFA MEDLINE” klinikasi, logistika terminali va boshqa tadbirkorlik subyektlarida yaratilgan sharoitlar bilan tanishyapti.

Yarmarka doirasida qoʻshni mamlakat vakillari bilan ikki tomonlama oʻzaro almashinuv kelishuvlarini imzolash rejalashtirilgan. Shuningdek, kooperatsiya asosida qiymati 250 milliard soʻmlik hamkorlik shartnomalarini imzolashi ham kutilmoqda.