Mamlakatimiz kelajagi, xalqimizning ertangi kuni, jonajon Oʻzbekistonimizning jahon hamjamiyatida munosib oʻrin egallashi yoshlarimizning bugungi taʼlim-tarbiyasi, qanday insonlar boʻlib voyaga yetishiga bogʻliq. Yurtimizda amalga oshirilayotgan keng koʻlamli islohotlardan koʻzlangan asl maqsad ham shu aslida.

Yaqinda nashrdan chiqib, keng kitobxonlar ommasi qoʻliga yetib borgan Oʻzbekiston Respublikasi oliy taʼlim, fan va innovatsiyalar vaziri Qoʻngʻirotboy Sharipovning ushbu kitobida ham yurtimizdagi oliy taʼlim tizimi, keyingi yillarda bu soha rivoji uchun hayotga tatbiq etilgan ezgu tashabbuslar, uning yutuq va kamchiliklari haqida soʻz boradi.

Muallifning turli fikr-mulohazalar, tahliliy-tanqidiy qarashlar asosida yozgan maqolalaridan tarkib topgan ushbu toʻplam Oʻzbekiston Respublikasi davlat mustaqilligining 33-yilligiga bagʻishlangan.

Kitobda mamlakatimiz taraqqiyotining yangi bosqichida amalga oshirilayotgan shiddatli islohotlar, oliy taʼlim tizimidagi sifat oʻzgarishlari ilmiy asoslangan.

Ishonamizki, yurtimizdagi oliy taʼlim, ilm-fan, taʼlim-tarbiya tizimi rivojining bugungi suratlariga chizgilar berilgan ushbu yangi asar nafaqat shu soha vakillari, balki keng jamoatchilik, oʻquvchi-yoshlar uchun qiziqarli boʻladi.

Ushbu kitob “Xalq soʻzi” va “Narodnoye slovo” gazetalari bilan hamkorlikda tayyorlandi va nashr etildi.